सिन्धुपाल्चोक : सिन्धुपाल्चोकको सुनकोशी गाउँपालिका– ६ पाटीडाँडाँमा रहेको महेन्द्रोदय माध्यमिक विद्यालयका विद्यार्थीहरुले आधुनिक मौरीको घार निर्माण गरी आम्दानी गर्न सुरु गरेका छन् ।
घारहरू विद्यार्थीहरूले फुर्सद तथा अतिरिक्त समय प्रयोग गरी टुनीको काठबाट तयार गर्ने गरेका हुन् । विद्यार्थीहरुले बनाएको मौरीको घारलाई विद्यालयले बजार व्यवस्थापन गरी बिक्री गर्ने गरेको विद्यालयका प्रधानाध्यापक कृष्णप्रपाद दंगाल बताउँछन् । ‘विद्यालयले बजार व्यवस्थापन गरेसँगै विद्यार्थीहरूले पठनपाठनसँगै व्यावहारिक सीप र आम्दानी गर्ने अवसर पाएका छन्’, प्रधानाध्यापक दंगालले भने, ‘गाउँपालिका प्रमुख टपेन्द्र तिमल्सिनालाई घार बिक्री गर्दै यो कार्यको शुभारम्भ गरेका हौं ।’
प्रतिघारको मूल्य ३ हजार ५ सय तोकिएको छ । विद्यार्थीहरुले आधुनिक घार बनाएको र विद्यालयले बेचिरहेको थाहा पाएर विभिन्न माहुरी फार्महरुबाट माग आईरहेको दंगालले बताए । विद्यालयले घार बिक्री गरेर आएको रकम घार निर्माणमा संलग्न विद्यार्थीहरुलाई नै वितरण गर्ने गरेको उनले सुनाए । ‘हामीले उहाँहरुको सीपको सम्मान गरेका हौं, जति घार बिक्री हुन्छ त्यो रकम विद्यार्थीहरुलाई नै वितरण गर्ने गरेका छौं’, उनले भने ।
गाउँपालिका अध्यक्ष टपेन्द्र तिमल्सिनाले विद्यालयमा मौरीपालन जस्तो सिर्जनशील तथा आत्मनिर्भर कार्यक्रम सुरु भएकोमा खुशी व्यक्त गर्दै आगामी दिनमा पनि यस कार्यलाई निरन्तरता दिन सुझाव दिए । उनले विद्यालयबाट ठूलो संख्यामा मौरीको घार उत्पादन भएमा बिक्री तथा अन्य आवश्यक सहयोगका लागि गाउँपालिकाले सहजीकरण गर्ने बताए ।
सुनकोशी गाउँपालिकाकै पहिलो प्राविधिक विद्यालय महेन्द्रोदयले कक्षा ९ देखि १२ सम्म प्राविधिक धारको अध्ययन गराउँदै आएको छ। पढाइसँगै सीप र उत्पादनलाई जोड दिइएकाले विद्यार्थीहरू व्यवहारिक ज्ञानमा दक्ष बन्दै गएको अभिभावक शेखर थापा बताउँछन् । विद्यार्थीहरूले मौरीको घारदेखि विभिन्न सीपमूलक सामग्री उत्पादन गर्दै आएका छन् । उत्पादन भएका सामग्रीहरू बिक्री समेत हुँदै आएका छन्, जसले विद्यार्थीलाई आत्मनिर्भर बन्ने प्रेरणा दिएको उनले बताए ।
विद्यालयमा अहिले ४ सय विद्यार्थी अध्ययनरत छन् । विद्यालयको आफ्नै छात्रावास नभए पनि नजिकैका घर भाडामा लिएर छात्रावासको व्यवस्था गरिएको छ । यस विद्यालयमा सुनकोशी गाउँपालिका मात्र नभई अन्य पालिका तथा जिल्लाबाट समेत विद्यार्थीहरू अध्ययनका लागि आउने गरेका छन् ।
विद्यालयमा कठिन विषयहरूलाई सहज बनाउन स्मार्टबोर्डमार्फत पढाइने व्यवस्था गरिएको छ । प्रत्येक कक्षाकोठामा सिसिटिभी क्यामेरा जडान गरिएको छ, जसले सुरक्षा र अनुशासन कायम गर्न सहयोग पुर्याएको छ । विद्यालयको गुणस्तर विकास तथा नतिजा सुधारका लागि सार्वजनिक बिदा र शनिबारका दिन कक्षा ५, ८, १० र १२ का विद्यार्थीलाई अतिरिक्त परीक्षा लिने व्यवस्था गरिएको विद्यालयका प्रधानाध्यापक दंगालले बताउँछन् ।
प्रतिक्रिया दिनुहोस !
