इरानसँगको युद्ध ट्रम्प समर्थकहरूका लागि किन बन्दैछ समस्या ?
चैत ७, २०८२ शनिबार १०:२९:५३
अमेरिका : राष्ट्रपति डोनाल्ड ट्रम्पले इरानमाथि आक्रमण गरेको झण्डै तीन हप्ता बितिसक्दा, सामान्य धारणा यस्तो बनेको छ कि उनका समर्थकहरू यो युद्धमा अझै पनि उनको साथमा छन् ।
यो सत्य हो कि ट्रम्पका समर्थकहरूले उनलाई ठूलो संख्यामा त्यागेका छैनन् । विशेष गरी मागा समर्थकहरूको ठूलो हिस्सा अझै पनि युद्धको पक्षमा रहेको बताउँछ । टकर कार्लसन, मार्जोरी टेलर ग्रीन, मेगिन केली जस्ता प्रभावशाली व्यक्तिहरूको विरोधले ग्रयाण्ड ओल्ड पार्टी (GOP) को व्यापक आधारमा खासै प्रभाव पारेको देखिँदैन ।
तर ट्रम्पले आफ्ना केही महत्वपूर्ण समर्थक समूहहरूलाई टाढा बनाइसकेका छन्, र अझ धेरैलाई टाढा बनाउने जोखिम पनि लिइरहेका छन् । हालैका सर्वेक्षणहरूले पनि यही कुरालाई पुष्टि गरेका छन् । यी विश्लेषणहरू प्रायः आफूलाई मेक अमेरिका ग्रट अगेन (MAGA) समर्थक भनेर चिनाउने मतदातामा केन्द्रित छन् । अधिकांश सर्वेक्षणहरूमा, करिब १० मध्ये ९ जनाले युद्धलाई समर्थन गरेका छन् ।
तर यो धेरै अचम्मको कुरा होइन, किनकि यी व्यक्तिहरू स्वयं ट्रम्पको राजनीतिक आन्दोलनका समर्थक हुन् । तर जब समग्र रिपब्लिकन र अझ व्यापक रूपमा २०२४ मा ट्रम्पलाई भोट दिनेहरूलाई हेर्ने हो भने, नतिजा त्यति राम्रो देखिँदैन । उदाहरणका लागि, नयाँ सर्वेक्षणले देखाउँछ कि २१ प्रतिशत रिपब्लिकनहरूले युद्धको विरोध गरेका छन् ।
(समग्र अमेरिकीहरूमा ५९ प्रतिशतले विरोध र ३७ प्रतिशतले समर्थन गरेका छन् ।) त्यस्तै, सप्ताहन्तमा गरिएको Yahoo News–YouGov सर्वेक्षणले देखायो कि १७ प्रतिशत रिपब्लिकनहरूले ट्रम्पको इरान नीति अस्वीकार गरेका छन् र २०२४ मा उनलाई भोट दिने २४ प्रतिशत मानिसहरूले पनि त्यस्तै असहमति जनाएका छन् ।
ट्रम्पका निष्ठावान समर्थकहरू अझै पनि साथमा हुनु उनको लागि राम्रो कुरा हो । तर करिब ४ जनामा १ जना (२५ प्रतिशत) जति मतदाताहरू, जसले १६ महिना अघि उनलाई भोट दिएका थिए, अहिले यो युद्ध मन पराउँदैनन् । तीमध्ये १५ प्रतिशतले त ‘कडा असहमति’ जनाएका छन्, जसले यो विषय उनीहरूका लागि गम्भीर भएको संकेत गर्छ ।
सन्दर्भमा हेर्दा, यी तथ्यांक त्यति आश्चर्यजनक छैनन् । पछिल्लो एक वर्षमा धेरै मुद्दाहरूमा करिब २० प्रतिशत वा सोभन्दा बढी रिपब्लिकनहरूले ट्रम्पको विरोध गरेका छन् । तर यही मुख्य कुरा पनि हो । GOP ले २०२६ को मध्यावधि निर्वाचनमा “ब्लू वेभ” (डेमोक्र्याटहरूको ठूलो जीत) बाट बच्न यी मतदाताहरूलाई आफ्नो पक्षमा राख्न आवश्यक छ । तर ट्रम्पले उनीहरूलाई निराश बनाउने कारणहरू दिइरहेका छन् ।
उनले बहुमतलाई टाढा बनाएका छैनन्, तर यति संख्या पनि पर्याप्त हुन सक्छ–यदि उनीहरूले डेमोक्र्याटलाई भोट दिए वा घरमै बसे भने–जसले रिपब्लिकनहरूको सीट संख्या घटाउन सक्छ । यसलाई बुझ्नका लागि इराक युद्धको उदाहरण हेर्न सकिन्छ, जुन दुई दशकअघि रिपब्लिकनहरूको लागि ठूलो राजनीतिक समस्या बनेको थियो । तर २००६ सम्म युद्ध सुरु भएको तीन वर्षपछि मात्रै GOP भित्र विरोध उच्चस्तरमा पुगेको थियो । तर इरान युद्धमा भने सुरुदेखि नै त्यस्तो स्तरको विरोध देखिएको छ ।
यदि युद्ध लामो समयसम्म चल्यो र खर्च बढ्दै गयो भने समर्थन अझ घट्न सक्ने सम्भावना छ । अर्को महत्वपूर्ण कुरा भनेको GOP भित्र ट्रम्पको समर्थन व्यापक भए पनि गहिरो भने छैन । Yahoo–YouGov सर्वेक्षण अनुसार, केवल करिब आधा रिपब्लिकन (४९ प्रतिशत) र २०२४ ट्रम्प मतदाताहरू (४७ प्रतिशत) ले मात्रै ट्रम्पको इरान नीतिलाई ‘दृढ रूपमा’ समर्थन गरेका छन् ।
यसको विपरीत, करिब ८० प्रतिशत डेमोक्र्याट र कमला ह्यारिसका मतदाताहरूले ‘दृढ रूपमा’ अस्वीकार गरेका छन् । यसले देखाउँछ कि विरोध अझ बढी भावनात्मक र बलियो छ र करिब आधा रिपब्लिकनहरू र ट्रम्प समर्थकहरू या त आलोचनात्मक छन् वा मध्यम समर्थनमा छन् । यसले संकेत गर्छ कि उनीहरू सधैं ट्रम्पको साथमा रहने छैनन् ।
हालैको Strength in NumbersVerasight सर्वेक्षणले देखाउँछ कि केही समर्थकहरू चाँडै नै युद्धप्रति निराश हुन सक्छन्। यस सर्वेक्षण अनुसार, २४ प्रतिशत रिपब्लिकनहरूले इरान युद्धलाई करदाताको पैसाको राम्रो प्रयोग मानेका छैनन् । तर यदि पेट्रोलको मूल्य प्रति ग्यालोन ४१ बढ्यो भने के भन्ने प्रश्नमा यो संख्या बढेर ३१ प्रतिशत पुगेको छ–अर्थात् करिब एक तिहाइ ।
वास्तविकता के छ भने, युद्ध सुरु भएदेखि नै पेट्रोलको मूल्य करिब ४१ बढिसकेको छ, र घट्ने संकेत देखिँदैन । यदि युद्धका लागि ठूलो बजेट (करिब ४२०० अर्बसम्म) मागियो, जमिनमा सेना पठाइयो, र मानवीय क्षति बढ्यो भने, मध्यम समर्थकहरू पनि विरोधमा जान सक्छन् । यदि यति मात्र पनि संख्या ट्रम्पबाट टाढा भयो भने, यो स्थिति इराक युद्धले रिपब्लिकनहरूको लागि ठूलो समस्या बनेको जस्तै हुन सक्छ ।
प्रतिक्रिया दिनुहोस !
