१०० रुपैयाँ बढीको सामानको भन्सार तिर्नुपर्ने नियम खारेज गर्न माग

वीरगन्ज : जेनजी पर्साले भारतमा १०० रुपैयाँ भन्द्या बढीको मालसामान ल्याउँदा भन्सार राजस्व तिर्नुपर्ने प्रावधान खारेज गर्न माग गरेको छ । 
 
वीरगन्ज लगायतका नाकामा सुरक्षाकर्मी र भन्सार कार्यालयका कर्मचारीले केहि दिन यता सीमावर्ती भारतीय बजारबाट नेपालीले घरायसी प्रायोजनका लागि किनमेल गरेर ल्याउने गरेका १०० रुपैयाँ बढी मूल्यका मालसामान भन्सार राजस्व तिर्न लगाएका छन् । नयाँ सरकार गठन भए लगत्तै सरकारको निर्देशनमा वीरगन्जसहितका नाकामा उक्त नियम लागू गरिएको छ । जसको सर्वत्र आलोचना र विरोध भइरहेको छ । 

उक्त नियमले पर्सासहित समग्र मधेसका जनता समस्यामा परेको भन्दै जेनजी पर्साले शुक्रबार पर्साका प्रमुख जिल्ला अधिकारी भोला दाहाललाई ध्यानाकर्षणपत्र बुझाउँदै उक्त नियम खारेज गर्न माग गरेको हो । 
नेपाल र भारतबीच शताब्दीयौँदेखि कायम रहेको सामाजिक, सांस्कृतिक र पारिवारिक सम्बन्ध (बेटी–रोटीको सम्बन्ध) केवल दुई देशको सीमामा मात्र सीमित नभई दुवै देशका नागरिकको भावना र जीविकासँग जोडिएको विषय रहेको जेनजी पर्साले जनाएको छ । 

वीरगन्जसहित देशभरका नाकमा रहेका भन्सार कार्यालयले सर्वसाधरणले एक सय रुपैयाँभन्दा बढी मूल्यका सामान ल्याउँदा कडाइ गर्ने र कर असुल गर्ने नीतिले सीमावासी आम नागरिकमा गम्भीर असर परेको जेनजी पर्साका संयोजक महादेवप्रसाद कुर्मीले बताए । 

सुशासन र परिवर्तनको नारामा बनेको अहिलेको सरकारबाट आम जनताले सहुलियतको अपेक्षा गरेको भएपनि भारतसंग सीमा जोडिएका मधेस प्रदेशका नागरिकसंग अहिलेको सरकारलेपनि दोस्रो दर्जाको नागरिकसंग ब्यवहार गरेको उनले बताए ।
नयाँ सरकार गठन लगत्तै वीरगन्जसहितका नाकामा नेपालीले भारतीय बजारबाट घरायसी प्रयोजनका लागि किनमेल गरेर आउँदा एक सय रुपैयाँ बढीको सामानको भन्सार कर तिर्नेपर्ने अव्यवहारिक नियमले थप प्रताडित बनाएको जेनजी पर्साले जनाएको छ । 

दैनिक उपभोग्य सामान ल्याउँदापनि अनिवार्य भन्सार कर तिर्नुपर्ने बाध्यकारी नियम तत्काल खारेज गर्नुपर्ने यादवले बताए । उनले भने,‘ वीरगन्ज एउटा खुल्ला बोर्डर हो ।यहाँ विभिन्न किसिमका तस्करी हुन्छ । त्यसलाई नियमन तथा रोकथाम गर्नु राज्यको दायित्व हो । तर तस्करी रोक्ने बहानामा सीमा क्षेत्रका मधेसका जनतालाई राज्यले सास्ती दिने काम गरिरहेको छ ।’ 

वीरगन्ज लगायतका नाकाबाट हुदैं आएका संगठीत तस्करी रोक्न छाडेर सर्वसाधरणले सीमावर्ती बजारबाट सुपन मूल्यमा दैनिक उपभोग्यका मालसामान ल्याउँदापनि भन्सार कर तिर्नुपर्ने सरकारी निर्णय मान्य नभएको जेनजी पर्साले जनाएको छ । 

केहि दिन यता वीरगन्ज लगायतका नाकाका भन्सारमा राजस्व चुहावट अर्थात तस्करी रोक्ने निहुँमा सर्वसाधरणलाई सास्ती दिने नियम अबिलम्ब हटाउनुपर्ने यादवले बताए । अन्यथा जेनजी पर्साले वीरगन्ज नाका बन्द लगायतका आन्दोलनमा उत्रिने चेतावनीपनि संयोजक यादवले ध्यानाकर्षणपत्र मार्फत दिएका छन् ।