जकार्ता : इन्डोनेशियाको राजधानी जकार्ता नजिक दुई वटा रेल एकआपसमा ठोक्किँदा कम्तीमा १४ जनाको मृत्यु भएको छ भने ८० भन्दा बढी मानिस घाइते भएका छन् । उद्धारकर्मीहरू अझै पनि भग्नावशेषमा फसेका यात्रुहरूलाई निकाल्ने प्रयासमा जुटिरहेका छन् ।
जकार्तासँग जोडिएको बेकासी सहरको रेल स्टेशनमा यो दुर्घटना भएको हो । कम्युटर लाइनको रेल र लामो दूरीको रेल एकआपसमा ठोक्किएको कम्युटर लाइनकी प्रवक्ता करिना अमान्डाले जानकारी दिएकी छन् ।
राज्य स्वामित्वको केएआई रेल कम्पनीले मंगलबार दिएको वक्तव्यअनुसार बिहान ०८ः४५ बजे (पश्चिम इन्डोनेशियाली समय) सम्म १४ जनाको मृत्यु पुष्टि भएको छ । साथै ८४ जना घाइतेहरूको अस्पतालमा उपचार भइरहेको बताइएको छ ।
इन्डोनेशियाको राष्ट्रिय खोज तथा उद्धार निकायका प्रमुख मोहम्मद स्याफीले घटनास्थलमा अझै पनि केही मानिसहरू भग्नावशेषमा फसेका कारण उद्धार कार्य जारी रहेको बताएका छन् । उनका अनुसार रेलका डिब्बाहरूमा ठूलो क्षति पुगेको र काम गर्ने स्थान साँघुरो भएकाले उद्धार कार्य जटिल बनेको छ । त्यसैले उद्धारकर्मीहरूले बिस्तारै फलामका संरचना काट्दै फसेका यात्रुहरूलाई निकाल्नुपर्ने अवस्था रहेको उनले बताएका छन् ।
प्रतिक्रिया दिनुहोस !
