खेलकुद मन्त्रालयको राखेपलाई आदेश : छानबिन गरी आवश्यक परे क्यानलाई कारबाही गर्नू
वैशाख २७, २०८३ आइतबार १४:५३:२१
काठमाडौं : युवा तथा खेलकुद मन्त्रालयले अख्तियारमा दर्ता भएको मुद्दा उपर नेपाल क्रिकेट संघ (क्यान) ले छानबिनमा आवश्यक जवाफ नपठाएको भन्दै कारबाही गर्न राखेपलाई पत्र पठाएको छ ।
युवा तथा खेलकुद मन्त्रालयले पहिलो सिजनको नेपाल प्रिमियर लिग (एनपीएल) को विषयमा २०८१ मंसिर १६ गते अख्यितार दुरुपयोग अनुसन्धान आयोगमा परेको मुद्दाको विषयमा यो पत्र राखेप पठाएको हो । राष्ट्रिय खेलकुद परिषद (राखेप) ले क्यानलाई बारम्बार पहिलो सिजनको एनपीएललाई लिएर अख्तियारमा परेको मुद्दाको कागजातसहितको स्पष्टिकरण माग्दै आएको थियो ।
क्यानले कागजात र स्पष्टिकरण नबुझाउँदा खेलकुद विकास ऐन २०७७ को दफा २९ बमोजिम कारबाही गर्न र निलम्बन गर्नेसम्मको कारबाही गर्नुपर्ने देखिएकाले आयोगको पत्र बमोजिमको जवाफ र आवश्यक कागजात पनि प्राप्त नभएको भन्दै पत्रमा उल्लेख गरिएको छ । युवा तथा खेलकुद मन्त्रालयका उपसचिव जगदिश पराजुलीले यस विषयमा अन्नपूर्ण पोष्टलाई जानकारी दिएका हुन् ।
उनले भने, ‘पहिलो सिजनको एनपीएलको विषयमा अख्तियारमा परेको उजुरीमा क्यानले पठाउनु पर्ने कागजात पठाएन । यसमा राखेपले बारम्बार पत्र पठाउँदा पनि क्यानले छानबिनमा आवश्यक कागजात नपठाउँदा हामीले राखेपलाई पत्र पठाएका हौं ।’ पत्र बैशाख २३ गते राखेपमा दर्ता भएको हो । यस विषयमा मन्त्रिस्तरीय निर्णय भइसकेकाले आवश्यक कारबाही गर्न मन्त्रालयले राखेपलाई निर्देशन दिएको छ ।
प्रतिक्रिया दिनुहोस !
