सनराइजर्स हैदराबादलाई फराकिलो अन्तरले पराजित गर्दै गुजरात टाइटन्स शीर्ष स्थानमा
वैशाख ३०, २०८३ बुधबार ८:१३:३७
काठमाडौं : इन्डियन प्रिमियर लिगमा गुजरात टाइटन्सले सनराइजर्स हैदराबादलाई ८२ रनले पराजित गरेको छ। अहमदाबादस्थित नरेन्द्र मोदी क्रिकेट स्टेडियममा टस हारेर पहिले ब्याटिङको निम्तो पाएको गुजरात टाइटन्सले निर्धारित २० ओभरमा ५ विकेट गुमाउँदै १६८ रन बनाएको थियो ।
गुजरातले दिएको १६९ रनको विजयी लक्ष्य पछाएको सनराइजर्स हैदराबाद ८६ रनमै कोल्याप्स भयो। १४.५ ओभरमा सनराइजर्स हैदराबाद अलआउट भएको हो।
सनराइजर्स हैदराबादका लागि कप्तान प्याट कमिन्सले बनाएको १९ र १९ सर्वाधिक रह्यो । त्यसबाहेक इशान किसनले ११, हेनरिच क्लासेनले १४ र सलिल अरोराले १६ रन बनाउँदा अन्य कुनै पनि ब्याटरले दोहोरो अङ्कमा रन बनाउन सकेनन्। फलस्वरूप सनराइजर्स हैदराबाद सस्तैमा समेटियो।
सनराइजर्स हैदराबादलाई सस्तैमा समेट्न गुजरात टाइटन्सका बलर द्वय कागिसो राबाडा र जेसन होल्डरले समान ३-३ विकेट लिए। प्रसिद्ध कृष्णले २ विकेट लिँदा मोहम्मद सिराज र रासिद खानले १-१ विकेट लिए।
त्यसअघि, ब्याटिङ गरेको गुजरात टाइटन्सका लागि ओपनर ब्याटर साइ सुदर्शनले सर्वाधिक ६१ रनको पारी खेले । उनले ४४ बलमा ५ चौका र २ छक्का प्रहार गरे। निशान्त सिन्धुले २२ र वासिङ्टन सुन्दरले ५० रन बनाए। जेसन होल्डर ११ रनमा अविजित रहे।
सनराइजर्स हैदराबादका लागि बलिङतर्फ प्रफुल्ल हिन्ज र सकिब हुसेनले २/२ विकेटले कप्तान प्याट कमिन्सले एक विकेट लिए। सनराइजर्स हैदराबादमाथि फराकिलो जित निकालेपछि गुजरात टाइटन्सले १२ खेलमा ८ जित र ४हारसहित १६ अङ्क बटुल्दै शीर्ष स्थानमा उक्लिएको हो। गुजरातसँगको हारपछि समान १२ खेल खेलेको सनराइजर्स हैदराबाद भने सात जीत र पाँच हारसहित १४ अङ्क बटुल्दै तेस्रो स्थानमा रहेको छ।
बुधबार आइपीएलमा एक खेल रहेको छ । जसमा रोयल च्यालेन्जर्स बेंगलोर (आरसीबी) र कोलकाता नाइट राइडर्सले प्रतिस्पर्धा गर्नेछन्।
प्रतिक्रिया दिनुहोस !
