१० खेलाडीमा सीमित पराग्वेसँग हार व्यहोर्दा टर्कीको विश्वकप यात्रा सकियो

काठमाडौ‌ : फिफा विश्वकप–२०२६ को समूह ‘डी’ को खेलमा पराग्वेसँग १–० ले पराजित  हुँदा टर्कीको विश्वकप यात्रा टुंगिएको  छ । सनफ्रान्सिस्को बे एरिया स्टेडियममा भएको खेलमा पराग्वेले खेलको दोस्रो मिनेटमा नै गोल गरेको हो । पराग्वेको लागि माटियास गालार्जले गोल गरेका हुन् । यो गोल नै निर्णायक रह्यो । 

खेलको पहिलो हाफको सुरुमा नै गोल व्यहोरेपछि टर्कीले निकै आक्रमक खेल्यो । जसका कारण खेलको बीचमा भनाभन पनि भयो । खेलको पहिलो हाफ तवानपूर्ण रह्यो । खेलको पहिलो हाफमा थप गरिएको ६ मिनेटको तेस्रो मिनेटमा पराग्वेका जर्सी नम्बर १० का मिगुएल एल्मिरोनले रातो कार्ड पाए। उनले टर्कीका खेलाडीसँग भनाभनको अवस्था हुँदा हातले मुख छोप्दै केही भनेपछि उनले रातो कार्ड पाएका हुन् । फिफाको नियम अनुसार खेलाडीले बहसका क्रममा विपक्षी खेलाडीलाई मुख छोपेर केही भनेको पाइएमा कार्ड दिइन्छ । 

खेलको ६२ औं मिनेटमा टर्कीको हेडर पराग्वेका गोलकिपरले सहजै नियन्त्रणमा लिए । पहिलो हाफबाट नै निरन्तर गोलको प्रयासमा जुटेको टर्कीले अन्तिम समयमा पनि गोल गर्न सकेन । यो खेलमा निकै तनाव रह्यो । दुवै टोलीको लागि यो खेल प्रतिष्ठको लडाइँ थियो । जसका कारण पराग्वे र टर्की दुवै टोलीको प्रशिक्षकले पनि पहेंलो कार्ड पाएका थिए । फिफा वरियतामा पराग्वेभन्दा १९ स्थान माथि रहेको टर्कीले १० खेलाडीमा सिमित भएको पराग्वेमाथि गोल गर्न सकेन । 

आजको पहिलो खेल समूह ‘डी’ को खेल रहेको थियो । जसमा अमेरिका र अष्ट्रेलियाले खेलेका थिए । जसमा अमेरिकाले अष्ट्रेलियालाई २–० ले पराजित गर्‍यो । दोस्रो खेलमा समूह ‘सी’ को रहेको थियो । जसमा मोरक्कोले स्कटल्यान्डलाई १–० ले पराजित गरेको थियो । तेस्रो खेलमा ब्राजिलले हाइटीलाई ३–० ले पराजित गरेको हो । लगातार २ हार व्यहोर्दै समूह ‘सी’ बाट हाइटी पनि राउन्ड अफ ३२ बाट बाहिरिइसकेको छ ।