भारत : सूर्य कान्तको एउटा अभिव्यक्तिपछि उत्पन्न विवादका बीच बनेको ‘कक्रोच जनता पार्टी’ को एक्स (ट्वीटर) अकाउन्ट प्रतिबन्धित गरिएको छ ।
मुख्य न्यायाधीश सूर्यकान्तको बयानपछि सुरु भएको विवादकै बीच यो पार्टी गठन गरिएको थियो । गत साता सुप्रिम कोर्ट अफ इण्डियामा एक मुद्दाको सुनुवाइका क्रममा सीजेआई सूर्यकान्तले देशका बेरोजगार युवाको तुलना कथित रूपमा ‘कक्रोच’ सँग गरेका थिए । विवाद बढेपछि उनले उक्त भनाइबारे स्पष्टीकरण पनि दिएका थिए ।
तर युवाहरूले उक्त अभिव्यक्तिको कडा विरोध गरे । त्यसकै विरोधस्वरूप ‘कक्रोच जनता पार्टी’ सुरु गरिएको थियो । सुरुमा व्यंग्य र मजाकका रूपमा सुरु गरिएको यो अभियान सामाजिक सञ्जालमा अत्यन्त लोकप्रिय बनेको थियो र यसको लाखौं फलोअर पुगेका थिए । इस्न्टाग्राममा पाँच दिनमै यसले एक करोड १७ लाख बढी फलोअर्स कमाएको थियो ।
केरला विधानसभामा भाजपाको ऐतिहासिक कदम
भारतीय जनता पार्टीले पहिलो पटक केरला विधानसभा सभामुख पदको चुनाव लड्ने भएको छ । तीन सिट जितेर विधानसभा पुगेको भाजपाले सभामुख पदका लागि उम्मेदवार उठाउने निर्णय गरेको हो । प्रदेश अध्यक्ष राजीव चन्द्रशेखरले बिहीबार यसको औपचारिक घोषणा गरेका हुन् ।
शुक्रबार हुने त्रिकोणात्मक र ऐतिहासिक प्रतिस्पर्धाका लागि विभिन्न राजनीतिक गठबन्धनले आफ्ना उम्मेदवार सार्वजनिक गरेका छन् । भाजपाका तर्फबाट कोल्लम जिल्लाको चथनूर क्षेत्रबाट निर्वाचित विधायक बीबी गोपकुमार उम्मेदवार बनेका छन् । उनको नाम राजीव चन्द्रशेखर र वी मुरलीधरनले प्रस्ताव गर्नेछन् । यता, कांग्रेस नेतृत्वको सत्तारूढ युनाइटेड डेमोक्रेटिक फ्रन्ट (यूडीएफ) ले वरिष्ठ नेता तिरुवनचूर राधाकृष्णनलाई उम्मेदवार बनाएको छ । विपक्षी एलडीएफले भने अहिलेसम्म आफ्नो उम्मेदवारको औपचारिक घोषणा गरेको छैन ।
प्रतिक्रिया दिनुहोस !
