नुवाकोट : नुवाकोटको शिवपुरीमा कार दुर्घटनामा परेको छ । सडक मार्गदेखि तल जंगलमा खसेर भएको दुर्घटनामा एक युवकको मृत्यु, भएको छ भने दुई जना घाइते भएका छन् ।
नुवाकोटबाट काठमाडौंतर्फ जाँदै गरेको बिएई ०५६९ विद्युतीय कार विहीवार वेलुकी नुवाकोटबाट काठमाडौं प्रवेशको छोटो दूरीको छहरे–गुर्जे–टोखा सडकमार्गमा दुर्घटनाग्रस्त भएको जिल्ला प्रहरी कार्यालय नुवाकोटले जनाएको छ । दुर्घटनामा सिरहाको सुखीपुर नगरपालिका–२ का ३५ वर्षीय सन्जिवकुमार चौधरीको मृत्यु भएको प्रहरी उपरीक्षक विपीन रेग्मीले जानकारी दिए ।
उनका अनुसार दुर्घटनामा घाइते तीन जनामध्ये चौधरीको ग्राण्डी अन्तर्राष्ट्रिय अस्पतालमा उपचारका क्रममा ज्यान गएको हो । दुर्घटनाग्रस्त कारण शिवपुरी गापाको गुरुङ गाउँ र गुर्जे–भञ्ज्याङ बीच सडकबाट एक सय ५० मिटर तल खसेर दुर्घटनाग्रस्त भएको हो । दुर्घटनालगत्तै स्थानीयवासी, प्रहरीले घाइतेहरुलाई उद्धार गरी उपचारका लागि अस्पताल पठाइएको थियो ।
दुर्घटना लगत्तै अस्थायी प्रहरी पोष्ट गुर्जेभन्ज्याङबाट प्रहरी अधिकृतसहितको प्रहरी टोली गएर स्थानीयवासीहरुको सहयोगमा घाइतेहरुलाई उद्दार गरेको थियो । कारमा सवार ३ जना गम्भिर घाइते तथा अचेत अवस्थामा रहेकाहरुलाई उद्दार गरी उपचारको लागि काठमाडौस्थित ग्राण्डी अन्तर्राष्ट्रिय अस्पतालमा पठाइएको थियो ।
दुर्घटनामा घाइते काठमाडौ महानगर–९ गौरीघाटका ४५ वर्षीय लोकेश मिश्र र कार चालक सुनसरीको इनरुवा नगरपालिका–५ घर भई हाल काठमाडौ महानगर–८ बस्ने ४० वर्षीय उत्सव पोखरेल घाइते भएका छन् । प्रहरीले कार चालक उत्सव पोखरेललाई नियन्त्रणमा लिएको प्रहरी उपरीक्षक रेग्मीले जानकारी दिए । कार दुर्घटनाको कारण खुल्न बाँकी रहेको र घटनाबारे थप अनुसन्धान भइरहेको नुवाकोट प्रहरीले जनाएको छ ।
प्रतिक्रिया दिनुहोस !
