उत्तर प्रदेश र बिहारमा आँधी र चट्याङबाट ४८ जनाको मृत्यु, ७५ जिल्लामा 'अलर्ट'
जेठ १६, २०८३ शनिबार ९:०:७
नयाँ दिल्ली : भारतको उत्तर प्रदेश र बिहारमा पछिल्लो २४ घण्टामा आएको आँधीहुरी, वर्षा र चट्याङका कारण ४८ जनाले ज्यान गुमाएका छन् । मौसमजन्य विपद्का कारण उत्तर प्रदेशमा ३१ र बिहारमा १७ जनाको मृत्यु भएको हो ।
भारी वर्षा र खराब मौसमका कारण बिहारको राजधानी पटनामा ४ वटा विमान डाइभर्ट गरिएका छन् भने १८ वटा उडानहरू ढिलो भएका छन् । जसका कारण ५०० भन्दा बढी यात्रुहरू अलपत्र परेका छन् । मौसम पूर्वानुमान महाशाखाका अनुसार आज पनि बिहारका २५ जिल्लामा वर्षाको सम्भावना कायमै छ ।
यता, उत्तर प्रदेशको सहारनपुरस्थित पहाडी क्षेत्रमा भएको भारी वर्षापछि आएको तीव्र बहाबले एउटा इनोवा कार र ट्र्याक्टरसहित १० वटा सवारी साधन बगाएको छ । मौसम विभागले आज यूपीका सबै ७५ वटै जिल्लामा वर्षाको चेतावनी (अलर्ट) जारी गरेको छ ।
पहाडी क्षेत्रमा हिमपात
राजस्थानमा पनि मौसममा ठुलो बदलाव आएको छ । शनिबार त्यहाँका ३० जिल्लामा आँधीसहित असिना पर्न सक्ने अनुमान गरिएको छ । यसअघि चुरु, हनुमानगढ, बीकानेर र सीकरसहित ९ जिल्लाको तापक्रममा १० डिग्री सेल्सियससम्म गिरावट दर्ता गरिएको थियो ।
उता प्रसिद्ध धार्मिक स्थल हेमकुण्ड साहिबमा शुक्रबार हिमपात भएको छ । वर्षापछि पहाडबाट खसेको पहिरो र भग्नावशेषमा कयौँ मोटरसाइकलहरू पुरिएका छन् भने रोहडू क्षेत्रमा भएको भारी असिनाबारीका कारण स्याउ खेतीमा व्यापक क्षति पुगेको छ ।
आगामी ७ दिनभित्र मनसुन भित्रिने
यसैबीच, भारत मौसम विज्ञान विभाग (IMD) ले दक्षिण-पश्चिम मनसुन आगामी ७ दिनभित्र केरल आइपुग्ने जनाएको छ । यद्यपि, विभागले यस वर्षको मनसुन सामान्यभन्दा कमजोर रहने प्रक्षेपण गरेको छ ।
आगामी जुनदेखि सेप्टेम्बर महिनासम्म देशका धेरैजसो भू-भागमा औसतभन्दा कम वर्षा हुने सम्भावना छ ।यस वर्ष मनसुनी वर्षा 'लङ पिरियड एभरेज' (LPA) को करिब ९० प्रतिशत मात्र हुन सक्छ । (भारतमा सामान्य मनसुनी वर्षाको औसत ८७ सेन्टिमिटर मानिन्छ) ।
पूर्वोत्तर भारतमा सामान्य वर्षा हुने अनुमान गरिए पनि देशका अन्य क्षेत्र, विशेष गरी वर्षामा आधारित खेतीपाती हुने भू-भागमा मनसुन कमजोर रहने आशंका छ ।
प्रतिक्रिया दिनुहोस !
