पाल्हीनन्दनकी उपाध्यक्षको पद गयो, लुम्बिनीका मन्त्रीसहित पाँच जनप्रतिनिधि कारबाहीको सूचीमा

परासी : पश्चिम नवलपरासीको पाल्हीनन्दन गाउँपालिकाकी उपाध्यक्ष फातुमा खातुन अन्सारीको पद गएको छ । निर्वाचन आयोगले उनको पद रिक्त भएको सूचना आजको गोरखापत्रमा निकालेर जनाएको हो । 

आयोगले राजनीतिक दलसम्बन्धी कानुन तथा नियमावलीअनुसार सम्बन्धित दलबाट प्राप्त जानकारी र निर्णयका आधारमा निर्वाचित पद स्वतः रिक्त भएको जनाएको हो । फातुमा २०७९ सालको स्थानीय निर्वाचनमा नेपाली कांग्रेसबाट निर्वाचित भएकी हुन् । गत प्रतिनिधिसभा निर्वाचनमा उनले आफ्ना दलका उम्मेदवारलाई हराउनका लागि अन्य दलका उम्मेदवारलाई भोट मागेको भन्दै पार्टीको जिल्ला अनुशासन समितिले कारबाहीका लागि निर्वाचन आयोगमा सिफारिस गरिदिन केन्द्रमा पत्र पठाएको थियो । केन्द्रको निर्णयअनुसार आयोगले उनको पद रिक्त भएको जनाएको हो । 

उनीसँगै जुम्ला गुठीचौर गाउँपालिकाका अध्यक्ष दानबहादुर बुढा, रुपन्देही बुटवल उपमहानगरपालिका–३ का वडाध्यक्ष विष्णु ढकालको पनि पद रिक्त भएको आयोगको सूचनामा जनाइएको छ । निर्वाचित जनप्रतिनिधिहरु अन्य दलमा प्रवेश गरेकोबारे सम्बन्धित दलको केन्द्रीय समितिले निर्णय गरी पठाएपछि उनीहरुको पद रिक्त हुने कानुनी व्यवस्था छ । 

यसैबीच फातुमासहित नवलपरासीबाट ४३ जना नेता–कार्यकर्तालाई कारबाहीका लागि केन्द्रमा सिफारिस गरिएको थियो । जसमा फातुमासहित ६ जना निर्वाचित जनप्रतिनिधिहरु रहेका छन् । कारबाहीका लागि सिफारिस गरिएका अन्य जनप्रतिनिधिमा लुम्बिनी प्रदेशका वन तथा वातावरण मन्त्री देवकरण कलवार, सुस्ता गाउँपालिकाकी उपाध्यक्ष गीता चौधरी, बर्दघाट नगरपालिका–१० का वडाध्यक्ष राजु मिश्र, वडा नम्बर ९ का वडा सदस्य बालिन्द्र विक्रम शाही र सुनवल नगरपालिका–२ का वडा सदस्य विकास क्षेत्री रहेको जिल्ला सचिव उमेशचन्द्र यादवले जानकारी दिए । कारबाहीका लागि सिफारिस भएका उनीहरुले खुलेर रास्वपाका उम्मेदवारलाई भोट मागेको आरोप छ ।