पेरिस : फ्रान्सका स्टार फरवार्ड किलियन एम्बाप्पेले फिफा विश्वकपमा आफ्नो उत्कृष्ट प्रदर्शनमार्फत आधुनिक फुटबलका सर्वाधिक प्रभावशाली खेलाडीमध्ये एकका रूपमा आफूलाई स्थापित गरेका छन्। कम उमेरमै विश्वकपमा कीर्तिमानमाथि कीर्तिमान बनाएका एम्बाप्पेले फ्रान्सलाई ठूलो सफलता दिलाउनुका साथै व्यक्तिगत रूपमा पनि ऐतिहासिक उपलब्धि हासिल गरेका छन्।
सन् २०१८ मा रुसमा सम्पन्न फिफा विश्वकप एम्बाप्पेको करियरको महत्त्वपूर्ण मोड बन्यो। त्यस विश्वकपमा उनले चार गोल गर्दै फ्रान्सलाई २० वर्षपछि विश्वकप उपाधि दिलाउन उल्लेखनीय योगदान दिएका थिए। फाइनलमा क्रोएसियाविरुद्ध गोल गरेपछि उनी १९५८ मा ब्राजिलका महान खेलाडी पेलेपछि विश्वकपको फाइनलमा गोल गर्ने पहिलो किशोर खेलाडी बनेका थिए। त्यो उपलब्धिले एम्बाप्पेलाई विश्व फुटबलको नयाँ सुपरस्टारका रूपमा स्थापित गराएको थियो।
सन् २०२२ मा कतारमा सम्पन्न विश्वकपमा पनि एम्बाप्पे झन् प्रभावशाली रूपमा प्रस्तुत भएका थिए। उनले प्रतियोगिताभर आठ गोल गर्दै ‘गोल्डेन बुट’ जितेका थिए। फाइनलमा अर्जेन्टिनाविरुद्ध ह्याट्रिक पूरा गर्दै विश्वकप फाइनलमा तीन गोल गर्ने इतिहासका दोस्रो खेलाडी पनि बनेका थिए। निर्धारित समय र अतिरिक्त समयमा बराबरी भएपछि खेल टाइब्रेकरमा पुगेको थियो, जहाँ फ्रान्स पराजित भए पनि एम्बाप्पेको प्रदर्शनले विश्वभर प्रशंसा बटुलेको थियो।
एम्बाप्पे विश्वकपका पहिलो दुई संस्करणमै १२ गोल गर्न सफल खेलाडी हुन्। यससँगै उनी विश्वकपमा सर्वाधिक गोल गर्ने खेलाडीहरूको सूचीमा आफूलाई स्थापित गर्ने अभियानमा छन्। उत्तर अमेरिकामा जारी विश्वकपमा ४ खेलमा ६ गोल गरिसकेका एमबाप्पे यस विश्वकपमा अर्जेन्टिनाका कप्तान लियोनल मेसीसँगै सर्वाधिक ६ गोल गर्ने सूचीमा अगाडि छन्। एमबाप्पे र मेसीले समान ६ गोल गरेका छन्। दुई असिस्टसमेत गरेका एमबाप्पे अब सर्वाधिक गोलकर्ताको सूचीको शीर्ष स्थानमा समेत उक्लिएका छन्।
एमबाप्पेले समूह चरणमा सेनेगल र इराकसँगको खेलमा दुई÷दुई गोल गरेका थिए। नर्वेविरुद्धको खेलमा भने उनले गोल गर्न सकेनन्। मंगलबार राति स्विडेनविरुद्धको खेलमा पनि दुई गोल नै गर्दै उनी सर्वाधिक गोलकर्तामा शीर्ष स्थानमा उक्लिएका हुन्। एमबाप्पे मेसीसँगै गोल्डेन बुटको दौडमा पनि अघि छन्। यी दुईलाई पछ्याइरहेका नर्वेका एर्लिङ हालान्डले ५ गोल गरेका छन्।
उनले पनि समूह चरणका दुई खेलमा दुई/दुई गोल गर्दा फ्रान्सविरुद्धको खेलमा भने खेलेका थिएनन्। यस्तै अन्तिम ३२ को खेलमा आइभरी कोस्टविरुद्ध निर्णायक गोल गर्दै नर्वेलाई अन्तिम १६ मा पुर्याउन महत्वपूर्ण योगदान गरेका थिए।
एमबाप्पेले विश्वकपमा अहिलेसम्म १८ खेल खेल्दा १८ गोल गरिसकेका छन्। उनी सर्वाधिक गोल गर्नेमा जर्मनीका मिरोस्लाभ क्लोजलाई पछि पार्दै दोस्रो स्थानमा पनि उक्लिएका छन्। यससँगै उनी सर्वाधिक १९ गोल गरेका मेसीभन्दा एक गोलले मात्र पछि छन्। जारी विश्वकपअघि मेसीको नाममा १३ र एमबाप्पेको नाममा १२ गोल थियो। यस विश्वकपमा दुवैले ६–६ गोल गर्दै क्लोजलाई पछि पारिसकेका छन् र विश्वकपमा सर्वकालीन गोलकर्ता बन्ने अभियानमा छन्।
तीव्र गति, उत्कृष्ट ड्रिब्लिङ, सटिक फिनिसिङ र दबाबपूर्ण खेलमा पनि निर्णायक भूमिका खेल्ने क्षमताले एम्बाप्पेलाई विश्व फुटबलका विशेष खेलाडी बनाएको छ। राष्ट्रिय टोलीका लागि उनले निरन्तर उत्कृष्ट प्रदर्शन गर्दै फ्रान्सलाई विश्व फुटबलको शक्तिशाली राष्ट्रका रूपमा कायम राख्न महत्त्वपूर्ण योगदान दिइरहेका छन्।
फुटबल विज्ञहरूका अनुसार एम्बाप्पे अझै आफ्नो करियरको उत्कर्षतर्फ अघि बढिरहेका छन्। उमेर, क्षमता र निरन्तरताका आधारमा उनले आगामी विश्वकपहरूमा थप कीर्तिमान बनाउने विश्लेषण गरिएको छ। त्यसैले विश्व फुटबलका समर्थकहरूको नजर अहिले पनि एम्बाप्पेको प्रत्येक प्रदर्शन र आगामी खेलमा केन्द्रित छ।
प्रतिक्रिया दिनुहोस !
