धादिङ : धादिङको रुबी भ्याली गाउँपालिकामा बाढीले बगाउँदा दुई जना श्रमिक बेपत्ता भएका छन् । इसिम खोलामा आएको आकस्मिक बाढीले उनीहरूलाई बगाएको हो । गाउँपालिकाको वडा नम्बर ४, ५ र ६ को बीचमा पर्ने इसिम खोलामा आएको बाढीले निर्माणाधीन सुपर आँखुखोला जलविद्युत् आयोजना नजिकै काम गरिरहेका दुई श्रमिकलाई बगाएको स्थानीयले बताएका छन् ।
बेपत्ता हुनेमा डडेलधुरा अजयमेरु गाउँपालिका–३ का ४१ वर्षीय रमेशबहादुर पाण्डे र रौतहट समानपुर गाउँपालिका–५ का ३२ वर्षीय नबी हुसेन मन्सुरी रहेका छन् । स्थानीय सुमन घलेका अनुसार अविरल वर्षापछि इसिम खोलामा पानीको बहाव एक्कासी बढ्दा उनीहरू खोला तर्ने क्रममा बाढीमा परेका हुन् ।
घटनापछि नेपाली सेना, नेपाल प्रहरी, सशस्त्र प्रहरी बल, स्थानीयवासी तथा सम्बन्धित निकायले बेपत्ता दुवै श्रमिकको खोजी कार्य तीव्र पारेका छन् । दुवै श्रमिकको अवस्था अज्ञात रहेको जिल्ला प्रहरी कार्यालय धादिङले जनाएको छ । यसैबीच वडा नम्बर ५ र ६ जोड्ने मुख्य पैदलमार्गमा गएको पहिरोले स्थानीयको आवतजावत समेत जोखिमपूर्ण बनेको छ ।
प्रतिक्रिया दिनुहोस !
