विराटनगर : सुनसरीको देवानगन्ज गाउँपालिका–३ कप्तानगन्जमा भएको हिंसात्मक घटनाको छानबिनका लागि गृह मन्त्रालयले गठन गरेको उच्चस्तरीय समितिले काम सुरु गरेको छ ।
समितिले सोमबार राति विराटनगर आइपुगेलगत्तै विभिन्न अस्पतालमा उपचाररत घाइतेसँग बयान लिएर प्रमाण संकलन थालेको हो । सुरक्षा स्रोतका अनुसार गोली लागेर घाइते भएका चार जनाको विराटनगरस्थित न्युरो अस्पताल, चार जनाको विराट नर्सिङ होम र एक जनाको नोबेल शिक्षण अस्पतालमा उपचार भइरहेको छ । समितिका सदस्यहरूले तीनवटै अस्पताल पुगेर घाइतेसँग घटनाका बारेमा प्रत्यक्ष जानकारी लिएका छन् ।
गृह मन्त्रालयमा सोमबार बसेको केन्द्रीय सुरक्षा बैठकपछि सहसचिव भूपेन्द्र थापाको संयोजकत्वमा पाँच सदस्यीय छानबिन समिति गठन गरिएको थियो । समितिलाई छानबिन सकेर सात दिनभित्र घटनाको प्रतिवेदन बुझाउने जिम्मेवारी दिइएको छ ।
समितिले उपचाररत घाइते, प्रत्यक्ष पीडित तथा उपलब्ध प्रमाणका आधारमा घटनाको वास्तविकता पत्ता लगाउने जनाएको छ । अब टोलीले देवानगन्जको कप्तानगन्ज पुगेर घटनास्थलको निरीक्षण गर्ने, प्रत्यक्षदर्शी, सुरक्षा निकाय तथा उपलब्ध भिडियोसहितका प्रमाणको अध्ययन गर्ने तयारी गरेको छ ।
छानबिनपछि घटनामा संलग्न वा जिम्मेवार देखिएका व्यक्ति तथा निकायमाथि कानुनी कारबाहीका लागि सरकारलाई सिफारिस गरिने गृह मन्त्रालयले जनाएको छ । मन्त्रालयले निष्पक्ष, तथ्यमा आधारित र विश्वसनीय छानबिन गर्न समितिलाई निर्देशन दिएको छ ।
देवानगन्ज–३ कप्तानगन्जमा दुई समूहबीचको विवाद हिंसात्मक बनेपछि स्थिति नियन्त्रणमा लिन प्रहरीले गोली चलाएको थियो । गोली लागेर एक जनाको मृत्यु भएपछि अवस्था तनावग्रस्त बनेको थियो । त्यसपछि स्थानीय प्रशासनले कफ्र्यु आदेश जारी गरेको थियो भने कर्फ्यूका क्रममा कप्तानगन्ज, इनरुवा लगायतका क्षेत्रमा आगजनी, तोडफोड, आक्रमण र कुटपिटका घटना भएका थिए ।
अहिले कर्फ्यू हटाइए पनि कप्तानगन्ज केन्द्रित निषेधाज्ञा कायम छ । गृह मन्त्रालयले छानबिन प्रतिवेदनका आधारमा घटनाको कारण, सुरक्षा व्यवस्थापनमा भएका कमजोरी र जिम्मेवार पक्षको पहिचान गरी आवश्यक कानुनी तथा प्रशासनिक प्रक्रिया अघि बढाउने छ ।
प्रतिक्रिया दिनुहोस !
