समीरबहादुर सिंह
युरोकपका सबै खेल राम्रोसँग हेर्न पाएको छैन । राम्रा टोलीको खेल भने हेर्ने गरेको छु । अहिले ब्याडमिन्टन प्रतियोगिताहरू चलिरहेकाले चाहेर पनि रातिको खेल हेर्न पाएको छैन ।
अहिलेसम्म खेल हेर्दा बलिया राष्ट्रकै दबदबा देखिन्छ । पहिलो चरणको खेल जारी रहेकाले अहिले नै युरोकप विजेताको अनुमान लगाउन हतार होलाजस्तो लाग्छ । म ब्याडमिन्टन खेलाडी भए पनि फुटबल मेरो मनपर्ने खेल हो।
विश्वकपमा म सधैं नेदरल्यान्डको पक्षमा हुन्छु । युरोकपमा नेदरल्यान्ड नभएकाले इङ्ल्यान्ड र बेल्जियमलाई समर्थन गरेको छु । क्वार्टरफाइनलदेखि भने सबै खेल हेर्ने सोचाइ बनाएको छु ।
विश्वकप होस् वा युरोकप, इङ्ल्यान्ड सदाबहार टोली हो । इङ्ल्यान्डको खेल्नै शैली राम्रो लाग्छ । इङ्ल्यान्डको टोलीमा जुझारु खेलाडी छन् । इङ्ल्यान्डको टिम भावना पनि प्रशंसनीय लाग्छ ।
बेल्जियमले पनि रामै खेलिरहेको छ । जर्मनी र फ्रान्सले पनि राम्रो खेलिरहेका छन् । जर्मनी पनि सदाबहार र सन्तुलित टोली हो । जर्मन टोलीका खेलाडीमा टिम स्पिरिट बलियो छ ।
व्यक्तिगत रूपमा सबै खेलाडी राम्रा छन् । युवा र अनुभवी खेलाडीको समि श्रण भएकाले पनि जर्मन टोली उत्कृष्ट देखिन्छ । मेरो विचारमा युरोकप इङ्ल्यान्ड, बेल्जियम, जर्मनी र फ्रान्समध्ये एउटाले जित्न सक्छ ।
विश्वकप विजेता जर्मनीको खेल्ने कला आक्रामक शैलीको छ । यसैगरी फ्रान्सले पनि आकर्षक फुटबल खेलिरहेको छ । समूहगत चरणमा चेक गणतन्त्र र स्पेनले पनि राम्रो खेलेको देख्छु ।
स्पेनको प्रदर्शन पनि कमजोर छैन । साबिक विजेता भएकाले स्पेनको पनि मनोबल उच्च रहनु स्वाभाविक हो । आयोजक राष्ट्र भएकाले फ्रान्सको पनि सम्भावना छ ।
फ्रान्सको बलियो पक्ष भनेको घरेलु मैदान र समर्थक पनि हुन् । तर म इङ्ल्यान्ड वा बेल्जियमले नै यो युरोकप जितोस् भन्ने चाहन्छु । (ब्याडमिन्टनका पूर्वखेलाडी समीरसँग गरिएको कुराकानीमा आधारित ।)
प्रतिक्रिया दिनुहोस !
