काठमाडौंः विश्वचर्चित मोबाइल म्यासेजिङ एप भाइबरले नेपाली भाषामै स्टिकर ल्याएको छ ।
नेपालमा बजार विस्तारलाई प्राथमिकतामा राखेको भाइबरले टुबोर्गसँगको सहकार्यमा पहिलो स्थानीयकृत स्टिकर परियोजनाको सफलतापछि नेपाली भाषामै पहिलो स्टिकर प्याकको बिहीबार सार्वजानिक गरेको छ ।
भाइबरले नेपाली भाषामा सार्वजानिक गरेको स्टिकरले सन्देश र सूचना प्रवाह गर्ने एक क्रान्तिकारी भूमिका निर्वाह गर्नुका साथै आपसी वार्तालाई अत्यन्त निजी बनाउन र मनको भावलाई राम्ररी व्यक्त गर्न मद्दत पुग्ने विश्वास कम्पनीले लिएको छ ।
कम्पनीले नेपाली नयाँ वर्ष २०७३ लाई उत्सवकारुपमा मनाउने सन्दर्भमा १० हजार बराबरको स्टिकरको प्याक निःशुल्क उपलब्ध गराएको थियो ।
भाइबरलाई भविष्यमा नेपालमा एक बृहत् डिजिटल सञ्चार एप्स्कारुपमा स्थापित गर्ने लक्षको लिइएको भाइबरका दक्षिण एसियाका क्षेत्रिय प्रमुख अनुभव नैय्यरले बताएका छन् ।
उनले काठमाडौंमा भएको कार्यक्रममा कम्पनीले लगानीका लागि तयारी भइरहेको जनाउँदै यहाँ भाइबरका प्रयोगकर्ता धेरै भएकाले आफूहरु उत्साहित भएको जानकारी दिए ।
उनका अनुसार नेपालमा भाइबरको कुल प्रयोगकर्ताको झन्डै ५ प्रतिशत प्रयोगकर्ता नेपालबाट रहेका छन् । कम्पनीले अन्य मुलुकमा भाइबरमाफर्त प्रदान गरिरहेको आएइआई सेवालाई नेपालमा पनि छिटै ल्याउने जनाएको छ ।
यो सुविधाबाट भाइबरमार्फत एकठाउँ बाट अर्काे ठाउँ पैसा पठाउन र रिचार्ज जस्ता कारोबार गर्न सकिने कम्पनीले जनाएको ।
प्रयोगकर्ताले देखाएको रुचीलाई ध्यानमा राख्दै नेपालका स्थानीय सेवाप्रदायकसँग सहकार्य गरी भाइबरले अबको केही महिनामै नेपालभर सेवा विस्तार गर्र्ने योजना बनाइरहेको नैय्यरले बताएका छन् ।
भाइबरले भर्खरै मात्र सुरुगरेको पब्लिक च्याटले पनि नेपालमा राम्रै स्थान पाएको छ । पब्लिक च्याटले प्रयोगकर्तालाई सेलिब्रेटी, प्रेरक व्यक्तित्व र नयाँ ब्रान्डसँग जोड्नेछ ।
नेपालमा माल्भिका सुब्बा, प्रियंका कार्की, ऋचा शर्मा र नग्मा श्रेष्ठ जस्ता सेलिब्रेटी लगायत पूर्वप्रधानमन्त्री डा. बाबुराम भट्टराईले समेत भाइबर पब्लिक च्याट्समा उपस्थिति जनाइसकेका छन् ।
कार्यक्रममा पूर्व मिस नेपाल अर्थ २०१२ नगमा श्रेष्ठले भाइबर नौलो र रमाइलो हुनुका साथै यसबाट आफ्ना विचार अद्यावधिक गर्न र विश्वसमक्ष पुर्याउन सजिलो हुने बताइन् ।
त्यस्तै नायिका ऋचा शर्माले भाइबर पब्लिक च्याटमा प्रवेश गर्न पाउँदा अत्यन्त रोमाञ्चित भएको बताएकी छिन् । उनले भाइबरको पब्लिक च्याटले ब्राण्ड र सेलिब्रेटीलाई उनका फलोअरसँग अत्यन्त नजिक बनाइराख्न मद्दत गर्ने बताइन् ।
विश्वभरी ७ करोडभन्दा बढी प्रयोगकर्ता रहेको म्यासेजिङ एप भाइबरले नेपालमा लगानी गर्न पनि चासो देखाएको छ । नेपालमा मात्र ४५ लाख सूचीकृत प्रयोगकर्ताले प्रयोग गर्दै आएको म्यासेजिङ एप भाइबरले लगानीका लागि टुबोर्ग कम्पनीसँग सहकार्य गरिरहेको क्षेत्रीय प्रमुख अनुभव नैय्यरले बताए ।
प्रतिक्रिया दिनुहोस !
