विराटनगरः मोरङका अलगअलग खोलामा आएको बाढीले बगाएर चारजनाको मृत्यु भएको छ । खोलाले बगाएर बुधबार बेपत्ता भएका रंगेली–९ टकुवाका १८ वर्षीय विशाल ऋषिदेवलाई बिहीबार मृत फेला पारिएको छ ।
मोरङ प्रहरी प्रमुख एसपी सन्दीप भण्डारीका अनुसार खोलाले बगाएको भन्दा पाँच किलोमिटर तल मधुवनीमा ऋषिदेवको शव प्रहरी र गाउँलेले फेला पारेका हुन् ।
रंगेली नगरपालिका–७ भएर बग्ने घाँगी खोलाको पुलको रेलिङबाट खसेर विशाल बेपत्ता भएका थिए ।
भौंडाहा–७ स्थित जुडी खोलाले बगाएर स्थानीय बनुलाल राजबंशीको बुधबार साँझ मृत्यु भएको छ ।
एसपी भण्डारीका अनुसार खोला तर्ने क्रममा खोलामा आएको बाढीले बगाएर बेपत्ता भएका राजवंशीको शव घटनास्थल भन्दा केही तल आफन्तले भेट्टाएर प्रहरीलाई जानकारी गराए थिए ।
मोरङको टाँडी गाविस–५ की ४७ वर्षीया निर्मला राईको स्थानीय तेली खोलामा आएको बाढीले बगाएर बुधबार मृत्यु भएको प्रहरीले जनाएको छ ।
खोला तर्ने क्रममा बगाएपछि मृत्यु भएको अवस्थामा राईको शव जाँते २ र ३ को सीमानामा फेला पारिएको हो ।
खोलाले बगाउँदै गर्दा निर्मलाका पति ५० वर्षीय मानबहादुर राई र जाँते–१ का २७ वर्षीय किरण राईलाई स्थानीयबासिन्दाले जीवितै उद्धार गरेको गाविसका पूर्व अध्यक्ष उपेन्द्र घिमिरेले बताए ।
घिमिरेले भने, ‘खोलाले बगाउँदै गरेको अवस्थामा दुबैजनालाई सकुशल उद्धार गर्न स्थानीय बासिन्दाले भ्याए । निर्मलाको भने शव मात्र भेटियो ।’
त्यस्तै मधुमल्लास्थित नुनसरी बक्राहा खोलाले बगाएर एक पुरुषको मृत्यु भएको छ । मधुमल्ला–४ स्थित घरबाट बक्राहा खोला तरेर बजारतर्फ जाने क्रममा खोलाले बगाउँदा ४५ वर्षीय रामप्रसाद गौतमको मृत्यु भएको इलाका प्रहरी कार्यालय मधुमल्लाका प्रहरी नायव निरीक्षक यदुकुमार खड्काले बताए ।
खड्काका अनुसार खोलाले बगाएर लगेको अवस्थामा गौतमको शव घटना स्थल भन्दा सात सय मिटर तल फेला परेको थियो ।
प्रतिक्रिया दिनुहोस !
