एजेन्सीः पोर्चुगिज स्ट्राइकर क्रिस्टियानो रोनाल्डो जारी युरोकप फुटबलमा अर्काे ऐतिहासिक सफलता नजिक पुगेका छन् ।
जारी प्रतियोगिताबाटै युरोकप फुटबलको लगातार चार संस्करणमा गोल गर्ने एक्ला खेलाडी बनेका रोनाल्डो युरोकप इतिहासमै सर्वाधिक गोल गर्ने एक्ला खेलाडी बन्ने कीर्तिमानको पनि नजिक पुगेका छन् ।
यद्यपि रोनाल्डोले त्यसका लागि शुक्रबार बिहान हुने पहिलो क्वार्टरफाइनल खेलमा पोल्यान्डको बलियो रक्षापंक्तिलाई चिर्नुपर्ने हुन्छ ।
रोनाल्डोलाई युरोकप फुटबलमा सर्वाधिक गोल गर्ने खेलाडी बन्नका लागि मात्र दुई गोल आवश्यक छ । हालसम्म सर्वाधिक चार युरोकपको मुख्य प्रतिस्पर्धामा सहभागी भएका रोनाल्डोले ती सहभागितामा आठ गोल गरेका छन् ।
उनीभन्दा अगाडि फ्रान्सका मिचेल प्लाटिनी छन् । युरोपेली फुटबल महासंघ (यूईएफए) का निलम्बित अध्यक्षसमेत रहेका प्लाटिनीले युरोकपको इतिहासमा नौ गोल गरेका छन् । प्लाटिनीले पाँच खेल खेल्दै नौ गोल गरेका थिए भने रोनाल्डोले आठ गोलका लागि १८ खेल खेलिसकेका छन् ।
पोल्यान्डविरुद्धको खेलमा दुई गोल गरेमा रोनाल्डो युरोकपको इतिहासमै सर्वाधिक गोल गर्ने खेलाडी बन्नेछन् । एक गोलमात्रै गर्न सकेमा पनि उनले प्लाटिनीको कीर्तिमानसँग बराबरी गर्नेछन् ।
समूहगत चरणको अन्तिम खेलमा हंगेरीविरुद्ध दुई गोल गर्दै रोनाल्डोले युरोकपमा आफ्नो गोल संख्या आठ पु¥याएका हुन् । रोनाल्डो सोही खेलपछि चारवटा युरोकपको मुख्य प्रतिस्पर्धामा गोल गर्ने एक्ला खेलाडी बनेका थिए ।
नया“ कीर्तिमानका लागि भने रोनाल्डोले निकै मेहनत गर्नुपर्नेछ । त्यसका लागि रोनाल्डोले प्रतियोगिताकै सर्वाधिक बलियो रक्षापंक्ति भएको पोल्यान्डको चुनौतीमा खरो उत्रन सक्नु पर्नेछ । क्वार्टरफाइनलसम्मको यात्रामा पोल्यान्डले चार खेलबाट मात्र एक गोल व्यहोरेको छ ।
पोल्यान्डविरुद्ध स्विट्जरल्यान्डले प्रिक्वार्टरफाइनल चरणमा एक गोल गरेको थियो । त्यसबाहेक अन्य टोलीले गोल गर्न सकेका छैनन् । पोल्यान्डले विश्व च्याम्पियन जर्मनीलाई समेत गोल गर्नबाट रोकेको थियो ।
पोल्यान्डविरुद्ध गोल गर्न सकेको अवस्थामा रोनाल्डोले व्यक्तिगत उपलब्धिमात्रै हात पार्ने छैनन्, उनले आफ्नो टोली पोर्चुगललाई समेत प्रतियोगिताको सेमिफाइनलमा पुयाउन मद्दत गर्नेछन् ।
रोनाल्डोले पनि अर्जेन्टिनी खेलाडी लियोनल मेसीले जस्तै आफ्नो देशलाई कुनै पनि ठूलो प्रतियोगिताको उपाधि दिलाउन सकेका छैनन् । तुलनात्मक रूपमा सहज प्रतिद्वन्द्वी पाएको पोर्चुगलले जारी युरोकपमा भाग्यको साथ समेत पाउँदै आएको छ ।
समूहगत चरणमा एउटै खेलमा पनि जित हात पार्न नसकेको पोर्चुगल तेस्रो स्थानमा आउने उत्कृष्ट चार टोलीभित्र पर्दै प्रिक्वार्टरफाइनलमा पुगेको थियो ।
त्यसैले यस पटक रोनाल्डोसामु व्यक्तिगत उपलब्धिका साथै देशकै लागि पनि ठूलो उपाधि दिलाउने गतिलो अवसर छ । क्वार्टरफाइनलमा पोल्यान्डलाई पराजित गर्न सकेको अवस्थामा पोर्चुगलले सेमिफाइनलमा वेल्स र बेल्जियममध्ये एकलाई प्रतिद्वन्द्वी पाउनेछ ।
प्रतिक्रिया दिनुहोस !
