काठमाडौं: चलचित्र विकास बोर्डबाट प्रदान गरिने राष्ट्रिय चलचित्र पुरस्कारमा यो पटक अभिनेता दयाहाङ राई र अभिनेत्री नम्रता श्रेष्ठले बाजी मारेका छन् ।
बोर्डको स्थापना दिवसका अवसरमा प्रदान गरिने यो पुरस्कारका सात विधामा उत्कृष्ट चलचित्रकर्मीको नाम सार्वजनिक गरिएको हो ।
चलचित्र विकास बोर्डमा गरिएको स्थापना दिवस विशेष कार्यक्रममा बोर्डका अध्यक्षराजकुमार राईले जुरीबाट छनोट ७ विधाका विजेतासँगै एउटा आदिवासी चलचित्र र जुरीका तर्फबाट दिइने विशेष पुरस्कारका विजेताको नाम सार्वजनिक गरिएको हो ।
वर्ष२०७२ मा प्रदर्शित चलचित्रहरुमध्ये उत्कृष्ट चलचित्र 'पशुपतिप्रसाद' बन्न सफल भएको छ। यही चलचित्रबाट लेखनमा खगेन्द्र लामिछाने उत्कृष्ट ठहरिए । त्यसैगरी यही चलचित्रबाट दिपेन्द्र के खनाल उत्कृष्ट निर्देशक बन्न सफल भए ।
चलचित्र कबड्डी कबड्डीबाट दयाहाङ राई उत्कृष्ट अभिनेता बन्न सफल भएका छन् । त्यसैगरी चलचित्र क्लासिकबाट नम्रता श्रेष्ठ उत्कृष्ट अभिनेत्री भइन् ।
त्यसैगरी छायाँकनमा 'ड्रिम्स' का सञ्जय लामा र पुरुषोत्तम प्रधानले संयुक्तरुपमा आफ्नो पोल्टा पारे । त्यसैगरी चलचित्र 'क्लासिक' बाट सुरेन्द्र पौडेल सम्पादनमा उत्कृष्ट ठहरिए ।
आदिवासी जनजाति चलचित्रतर्फ गुरुङ भाषाको 'यम्फु देवराली' उत्कृष्ट ठरहिँदा जुरीबाट दिइने विशेष पुरस्कार नव निर्देशककारुपमा भुवन केसीले हात पारे ।
यसैबीच लाईफटाईम एचिभमेन्ट पुरस्कार नेपालकी पहिलो अभिनेत्री बसुन्धरा भुसालले हात पारिन् । भुसाललाई ३ लाख ५१ हजार र सम्मान पत्र दिइने भएको छ ।
यी पुरस्कार साँझ राष्ट्रपति भवनमा हुने विशेष कार्यक्रममा राष्ट्रपति विधादेवी भण्डारीले प्रदान गर्ने कार्यक्रम छ ।
२०७२ का लागि उत्कृष्ट चलचित्र र चलचित्रकर्मी छनौटको जिम्मेवारी रमेश बुढाथोकी संयोजक रहेको निर्णायक समितिले गरेको थियो ।
अन्य निर्णायकहरुमा लय संग्रौला, सरिता लामिछाने, मोहन निरौला, सुशील पौडेल र करुण थापा रहेका थिए । निर्णायक समितिले २०७२ मा प्रदर्शित चलचित्र मध्येबाट उत्कृष्टको छनौट गरेको हो ।
प्रतिक्रिया दिनुहोस !
