गुगल गगल्समा तस्बिरबाट जानकारी

गुगलले विकास गरेको गुगल गगल्स एप ‘इमेज रिकोग्निसन सफ्टवेयर' हो । आफूले खिचेका फोटोलाई गुगलले आफ्नो सर्भरमा प्रोसेसिङ गरेर त्यस तस्बिरबाट निकाल्न सकिने सबै जानकारी प्रस्तुत गरिदिन्छ । यो एप एन्ड्रोइड र आईओएस दुवै मोबाइल अपरेटिङ सिस्टममा उपलब्ध छ । एन्ड्रोइडका लागि गुगल प्ले स्टोर र आईओएसका लागि एप स्टोरबाट निःशुल्क डाउनलोड गर्न सकिन्छ ।

कतै घुम्न जाँदा वा कसैको घरमा कुनै प्रसिद्ध ठाउँको तस्बिर देखियो । तर त्यस ठाउँको नाम र अन्य जानकारी थाहा भएन । नाम त अरू साथीभाइलाई सोध्न सकिन्छ तर त्यो ठाउँका बारेमा जानकारी नहुन सक्छ । यस्तो अवस्थामा ‘गुगल गगल्स एप' काम लाग्छ ।

आफ्नो मोबाइलमा यो एप खोलेर सो तस्बिरको फोटो खिचेर, त्यस ठाउँको सम्पूर्ण जानकारी लिन सकिन्छ । गुगलले आफ्नो सर्भरको डेटा बेसमा त्यस ठाउँको बारेमा भएका जानकारी ‘गुगल सर्च' प्रस्तुत गर्छ ।

ठाउँको प्रयोजनमा मात्रै यो एप सीमित छैन, कुनै पनि प्रसिद्ध व्यक्तिको तस्बिर खिचेर ती व्यक्ति को हुन्, के हुन् भन्ने पनि थाहा पाउन सकिन्छ । यो एपले अप्टिकल क्यारेक्टर रिकोग्निसन् (ओसीआर) प्रविधि प्रयोग गर्छ ।

छापिइसकेका लेखहरू यदि कम्प्युटरमा टाइप गर्नुपर्नेछ भने यो एप एकदमै काम लाग्नसक्छ । कुनै किताब, पत्रिकाबाट केही वाक्य, अनुच्छेद वा कुनै प्रकारको सूची कम्प्युटरमा टाइप गर्नुपर्नेछ भने यो एपले फोटो खिचेर ‘टेक्स्ट' निकाल्न मिल्छ । यो फिचर समय बचतका लागि उपयोगी छ ।

गुगल गगल्स प्रयोग गरेर अंग्रेजी, फ्रान्सेली, इटालियन, जर्मन, स्पेनिस, रुसी, टर्की र अन्य भाषामा भएका शब्दलाई अन्य भाषामा सजिलै अनुवाद गर्न सकिन्छ । कुनै चाइनिज होटल, रेस्टुरेन्टमा जाँदा चाइनिज भाषामा लेखिएको छ र आफूलाई थाहा भएन भने गुगल गगल्स प्रयोग प्रयोग गरेर जानकारी लिन सकिन्छ । शब्दहरूको फोटो प्रोसेस गर्दा यो एपले आफैं अनुवाद गर्ने अप्सन दिन्छ ।

घन्टौं लगाएर ‘सुडुको' खेल समाधान गर्नुपर्दा समय खेर जान सक्छ । यसका लागि पनि गुगल गगल्स काम लाग्नसक्छ । ‘सुडुको'को फोटो खिचेर एपले त्यस ‘सुडुको'को फोटो प्रोसेस गरेर त्यसको समाधान आफैं गरिदिन्छ । हालसम्म ५० करोड एन्ड्रोइड प्रयोगकर्ताले यो एपको सुविधा लिइसकेका छन् ।

गुगलद्वारा निर्मित एस एपले सबै व्यक्ति, वस्तु, स्थान चिन्न नसके पनि इमेज रिकोग्निसन सफ्टवेयरमध्ये गुगल गगल्स नं. १ मानिएको छ ।

प्रस्तुती: रविन्द्र लम्साल