मोबाइल फोन उद्योगमा जेडटीईको प्रवेश

काठमाडौंः विश्वकै दूरसञ्चार तथा सूचना प्रविधि क्षेत्रको सफल नेतृत्व गरिरहेको जेडटीई कर्पोरेसनले मंगलबार ब्लेड सिरिजअन्तर्गतका तीन नयाँ मोडेल सार्वजनिक गरेको छ । ती स्मार्ट फोनमा एस-६, डी-२ र डी-३ छन् । कम्पनीले जेडटीई मोबाइल फोनका यी नयाँ मोडल नेपाली बजारमा बिक्रीका लागि इभोलुसन इन्टरप्राइज प्रालि लाई आधिकारिक विक्रेता तोकेको छ ।

सुलभ मूल्यमा सबै किसिमका फिचरसहितका स्मार्ट फोन खरिद गर्न चाहने नेपाली युवाको चाहनालाई ध्यानमा राखेर नयाँ स्मार्ट फोन नेपाली बजारमा ल्याइएको इभोलुसन इन्टरप्राइजका प्रबन्ध निर्देशक विशाल आचार्यले बताए । ‘जेडटीई मोबाइललाई नेपाली बजारमा सार्वजनिक गर्न पाउँदा हामीलाई खुसी लागेको छ,' आचार्यले भने, ‘उच्च प्रविधियुक्त विशेषतासहित सुलभ मूल्यमा जेडटीई ब्लेड सिरिजको स्मार्ट फोन नेपाली बजारमा आएको छ ।' फोर जी सपोर्ट गर्ने संयन्त्रसहितका यी फोन नेपाली आन्तरिक बजारमा लोकप्रिय, प्रतिस्पर्धी र स्थापित ब्रान्डका रूपमा कहलिनेमा कम्पनी विश्वस्त छ ।

ब्लेड एस-६ विश्वकै पहिलो एन्ड्रोइड-एल मोबाइल फोन हो, जुन क्वाल्कम स्नापड्रागन अक्टाकोर १.५ गिगाहर्ज प्रोसेसरसयुक्त छ । पाँच इन्चको पूर्ण एचडी डिस्प्ले र ७.७ एमएम मोटाइ रहेको एस-६ प्रयोगकर्तामैत्री पनि छ । यसमा रहेको चेन्जिङ क्यामरालाई प्रयोगकर्ताले आफ्नो अनुभवका आधारमा प्रयोग गर्न सक्नेछन् । यस फोनले १३ मेगापिक्सेल सोनी आईएमएक्स-१४ क्यामरालाई प्रोफेसनल मुडमा सपोर्ट गर्न सक्छ । त्यस्तै यसमा ५ मेगापिक्सेल फ्रन्ट क्यामरा छ । एस-६ मा २ जीबी र्‍याम र १६ जीबी रोम रहेको छ ।

२४ सय एमएएच पावरको ब्याट्री जडान गरिएको यस मोबाइल फोन सेटमा अंग्रेजी ‘भी' वर्ण कोरेपछि म्युजिक प्ले हुन्छ । त्यस्तै मोबाइललाई हल्लाएरै टर्च लाइट अन गर्न सकिन्छ । एस-६ को मूल्य १५ हजार नौ सय ९० रुपैयाँ रहेको कम्पनीले जनाएको छ ।

त्यस्तै डी-२ मोडेलको जेडटीई फोनलाई ब्याट्री फोनको रूपमा चिनिन्छ । यसमा रहेको चार हजार एमएएच ब्याट्री करिब ३५ दिनसम्म अन मोडमै राखे पनि चलिरहन्छ । यसमा रहेको ब्याट्रीको क्षमताले एकपटकको फुल चार्जबाट करिब ११ घन्टा अनलाइन गेम, १८ घन्टा इन्टरनेट प्रयोग र ३५ घन्टासम्म फोनमा कुरा गर्न सकिन्छ । ७६ घन्टा म्युजिक सुन्न र १८ घन्टासम्म भिडियो हेर्न सकिन्छ ।

क्वाडकोर प्रोसेसरयुक्त यस फोनमा ५ इन्चको एचडी आईपीएस कभर्ड डिस्प्ले छ । ब्लेड डी-२ मा ८ मेगापिक्सेलको पछाडिको क्यमरा रहेको छ भने ५ मेगापिक्सेलको फ्रन्ट क्यामरा छ । यो फोनको नेपाली बजार मूल्य १० हजार नौ सय ९० रुपैयाँ रहेको छ ।

यस्तै ब्लेड डी-३ फोन १.३ जीएचजेड क्वाडकोर प्रोसेसर युक्त छ । यो फोन ५ इन्चको एचडी आईपीएस डिस्प्लेयुक्त छ । यस फोनमा प्रोफेसनल मुडमा १३ मेगापिक्सेल क्षमतामा फ्रन्ट क्यामराले काम गर्न सक्छ । यो सेल्फी फोनका रूपमा चर्चित पनि छ । यसमा ८ मेगापिक्सेलको फ्रन्ट क्यामरा छ ।

क्यामरामा एक जीबी र्‍याम र ८ जीबी रोम छ । २४ सय एमएएच ब्याट्री क्षमतायुक्त यस फोनमा अटो-कल तथा अटो-एन्सरको अप्सन पनि समाविष्ट छ । यो फोनलाई कम्पनीले बजारमा १२ हजार पाँच सय रुपैयाँमा वितरण सुरु गरेको छ । नेपालमा जेडटीई मोबाइलका करिब २८ रिडिस्ट्रब्युटरबाट फोन उपलब्ध हुने कम्पनीले जनाएको छ ।