बैकहरूको आम्दानी आकर्षक
काठमाडौंः वाणिज्य बैंकहरूको प्रतिसेयर आम्दानी आकर्षक बन्दै गएको छ । अधिकांश बैंकको प्रतिसेयर आम्दानी २० रुपैयाँमाथि पुगेको छ ।
आर्थिक वर्ष २०७२/७३ को अपरिस्कृत वित्तीय विवरण सार्वजनिक गरेका १८ वटा वाणिज्य बैंकमध्ये १४ वटाले प्रतिसेयर आम्दानी २० रुपैयाँ माथि पुर्याएका छन् । प्रतिसेयर आम्दानी बढ्दै जाँदा लगानीकर्तालाई फाइदा हुन्छ । बैंक पनि वित्तीय हिसाबले सबल बनेको बुझ्न सकिन्छ ।
प्रतिसेयर आम्दानीका आधारमा कुन कम्पनीले कतिप्रतिशतसम्म लाभांश दिन सक्छ भन्ने अनुमान लगाउन सकिन्छ । बैंकको समग्र वित्तीय अवस्थामा अन्य थुप्रै सूचकलाई अध्ययन गर्नुपर्ने भए पनि प्रतिसेयर आम्दानीलाई लगानीकर्ताले प्रमुख आधार मान्छन् ।
यसको आधारमा बैंकले कुन ढंगले प्रगति गर्दै गएको छ भनेर सामान्य अनुमान लगाइहाल्न सजिलो हुन्छ ।
अहिलेसम्म वित्तीय विवरण सार्वजनिक गरेका १८ वटा वाणिज्य बैंकमध्ये सबैभन्दा धेरै प्रतिसेयर आम्दानी (ईपीएस) नेपाल बैंकले ल्याएको छ । मुलुककै सबैभन्दा पुरानो यो बैंकको वित्तीय अवस्थामा निकै सुधार आएको देखिन्छ ।
केही वर्षअघिसम्म खराब कर्जाले थलिएको यो बैंक वित्तीय क्षेत्र सुधार कार्यक्रम कार्यान्वयनपछि क्रमशः सुधार हुँदै अहिलेको अवस्थामा आइपुगेको हो ।
जगेडा कोषलाई धनात्मक बनाएको यो बैंकको प्रतिसेयर आम्दानी ४६ रुपैयाँ ६९ पैसा पुगेको छ । अहिलेसम्म विवरण सार्वजनिक गरेकामा सबैभन्दा बढी खुद नाफा कमाउने बैंक पनि नेपाल बैक नै भएको छ । यो बैंकले खुद नाफा तीन अर्ब कटाएको छ ।
अहिलेसम्म वासलत सार्वजनिक गरेका वाणिज्य बैंकहरूमा नेपाल बैंकपछि दोस्रो धेरै प्रतिसेयर आम्दानी सिद्धार्थ बैंकको देखिएको छ । समग्र वित्तीय अवस्था आकर्षक बनाउँदै लगेको सिद्धार्थले प्रतिसेयर आम्दानी ४१ रुपैयाँ १९ पैसा पुर्याउन सफल भएको छ ।
सिद्धार्थपछि प्रतिसेयर आम्दानीका आधारमा तेस्रो स्थानमा नेपाल बंगलादेश बैंक परेको छ । बंगलादेश बैंकको प्रतिसेयर आम्दानी ३९ रुपैयाँ पुगेको छ । बंगलादेशलाई पछ्याउँदै नेपाल इन्भेस्टमेन्ट बैंक, सिटिजन्स् र सानिमा आएका छन् ।
चौथो त्रैमासिक रिपोर्ट अनुसार सिटिजन्स्को प्रतिसेयर आम्दानी ३५ रुपैयाँ ५६ पैसा पुगेको छ भने नेपाल इन्भेस्टमेन्ट बैंकको ३५ रुपैयाँ १६ पैसा छ । इन्भेस्टमेन्ट बैंक हरेक सूचकले सबल भए पनि चुक्ता पुँजी धेरै हुँदा प्रतिसेयर आम्दानी ३५ रुपैयाँ हाराहारीमा मात्र देखिएको हो । यस्तै, सानिमाको ३४ रुपैयाँ १७ पैसा आम्दानी देखिएको छ ।
यसैगरी, वित्तीय विवरण सार्वजनिक गरेका प्राइम कमर्सियल, एनएमबी, कुमारी, एनआईसी एसिया, माछापुच्छे, सनराइजलगायतका बैंकको पनि प्रतिसेयर आम्दानी आकर्षक देखिएको छ । प्रतिसेयर आम्दानी बढ्नु भनेको कम्पनीको वित्तीय अवस्था पनि मजबुत बन्दै गएको बुझ्न सकिन्छ ।
लगानीकर्ताले भने सेयर किन्दा प्रतिसेयर आम्दानीसँगै मूल्य आम्दानी अनुपातलाई पनि ख्याल गर्नुपर्छ ।प्रतिसेयर आम्दानी बढी अनि मूल्य आम्दानी अनुपात चाहिँ कम भएको सेयर किन्दा भविष्यमा भाउ बढ्ने सम्भावना अधिक हुmन्छ ।
खुद आम्दानी, प्रतिसेयर नेटवर्थ, इक्विटीमा प्रतिफल, निक्षेप संकलन, कर्जा प्रवाह तथा जगेडा कोषलाई पनि लगानीकर्ताले विशेष ख्याल गर्नुपर्छ ।
प्रतिक्रिया दिनुहोस !
