पर्यटन प्रवद्र्धनमा आधुनिकता आपनाउँदै बोेर्ड

काठमाडौंः  नेपाल पर्यटन बोर्डले पर्यटन प्रवद्र्धनमा आधुननिक शैली पछ्याउन थालेको छ ।

प्रवद्र्धनका काम गर्दा सामाजिक सञ्जालको प्रयोग गर्ने, डिजिटल मार्केटिङ गर्ने, अन्तर्राष्ट्रिय सञ्चार माध्यममा नेपालको प्रवद्र्धन गर्ने तथा अनलाइन मार्केटसम्म पुग्ने गरी नयाँ र आधुनकि शैलीलाई पछ्याउँदै चालू आर्थिक वर्ष २०७३/०७४ को बजेट तयार पारेको छ । चालू आर्थिक वर्ष एक अर्ब १२ करोड ५० लाख रुपैयाँको बजेट तयार पारेको बोर्ड सञ्चालक समितिका सदस्य राजेन्द्रप्रसाद सापकोटाले जानकारी दिए ।

उनका अनुसार बोर्डले पहिलोपटक डिजिटल मार्केटमा जाने गरी बजेट तय गरेको छ । बोर्डले पहिलोपटक प्रवद्र्धनात्मक सामग्रीको प्रचार गर्न डिजिटल मार्केटमार्फत जाने गरी बजेट तय गरेको छ । बोर्डले चालू आवका लागि पर्चा, पम्प्लेट, पोस्टर नछाप्ने र यसका लागि डिजिटलमार्फत प्रवद्र्धन गर्ने गरी एक करोड ७० लाख रुपैयाँ विनियोजन गरेको छ । बोर्डले नौ करोड रुपैयाँ खर्च गरेर चालू आवमा नेपालको प्रचार बेलायती सञ्चारमाध्यम ब्रिटिस ब्रोडकास्टिङ कर्पोरेसन (बीबीसी)बाट गर्ने भएको छ ।

बोर्डले चालू आवमा बीबीसीबाट नेपालको प्रचार गर्न नौ करोड रुपैयाँको बजेट तय गरेको छ । बजेटमार्फत बीबीसीमा खर्च गर्ने गरी तय गरेको यो बजेट सन् २०११ पछि दोस्रोपटक भएको पनि बोर्डले जानकारी दिएको छ । सन् २०११ मा नेपालको प्रचार अन्तर्राष्ट्रिय सञ्चार माध्यममार्फत गर्ने विषयले निकै महत्व पाएको भए पनि समयमा नै रकम भुक्तानी गर्न नसक्दा समस्या भएको थियो ।

बोर्डले प्रभावकारकारी ढंगबाट अन्तर्राष्ट्रिय मिडियामा जान नसकेको भन्दै आगामी वर्षका लागि समयमा नै निर्णय गरेर बेजेट समेत तय गरेको दाबी गरेको छ । बोर्डले यस अघिका दुई वर्ष बीबीसी र सीएनएनमा नेपालको प्रचार गर्ने भने पनि खर्च हुन नसकेका कारण गत आवको बजेटलाईसमेत चालू आवमै खर्च गर्ने व्यवस्थासमेत मिलाएको बोर्ड सदस्यले बताए ।

बोर्डले पहिलोपटक अन्तर्राष्ट्रिय ट्राभलको वेवपोर्टल ट्रिप एडभाइजरमार्फत नेपालको प्रवद्र्धन गर्न दुई करोड ५० लाख रुपैयाँ खर्च गर्ने गरी बजेट तय गरेको छ । नेपालमा हिमालय ट्राभल मार्ट आयोजना गर्न एक करोड रुपैयाँ विनियोजन गरेको छ । अन्तर्राष्ट्रिय समाचार एजेन्सी रोयटर्समार्फत नेपालमा विभिन्न टोलीलाई भ्रमण गराएर नेपालको प्रवद्र्धन गर्न ८० लाख रुपैयाँ खर्च गर्ने गरी बोर्डले बजेट तय गरेको छ ।

बोर्डले तय गरेको चालू आवको बजेटमा २६ करोड ५० लाख रुपैयाँ जनसम्पर्क तथा प्रचारप्रसारमा, २३ करोड २५ लाख बजारीकरण तथा प्रवद्र्धनमा, कर्पोरेटमा १७ करोड,१६ करोड रुपैयाँ संस्कृतिक सम्पदा सरक्षण र प्रवद्र्धनमा, दुई करोड रुपैयाँ अनुसन्धानमा, तीन करोड रुपैयाँ पोखरा पर्यटन कार्यालयमार्फत खर्च गर्ने गरी कुल एक अर्ब १२ करोड रुपैयाँको बजेट विनियोजन भएको छ ।

सरकारले विसं २०७३ लाई घुमफिर वर्षका रूपमा प्रवद्र्धन थालेको छ । आन्तरिक पर्यटक प्रवद्र्धन गर्न र आन्तरिक पर्यटकीय गन्तव्यको विकासका निम्ति बोर्डले एक करोड १५ लाख रुपैयाँ विनियोजन गरेको छ । यो बजेटले पर्यटकीय स्थलको भ्रमण, जनचेतना अभिवृद्धि, पर्यटकीय गन्तव्यको स्थलगत निरीक्षणसहितका कार्यमा खर्च गर्ने गरी बजेट तय भएको बोर्ड सदस्य सापकोटाले बताए ।

बोर्डको बजेट ६ वर्षपछि साउनमै

बोर्डको आन्तरिक विवाद र विभिन्न समस्याको कारण ६ वर्षपछि साउनमा नै बजेट आएको र स्वीकृति पनि भएको बोर्डले जानकारी दिएको छ । पछिल्लो ६ वर्षसम्म बोर्डमा भएको राजनीतिक खिचातानी र आन्तरिक कहलका कारण बोर्डले समयमा नै बजेट ल्याउन नसक्दा खर्च पनि हुन सकेको छैन । बोर्डले करिब चार वर्षसम्म त प्रमुख कार्यकारी अधिकृत सीईओ नै नपाएका कारण समयमा बजेट ल्याउन सकेको थिएन भने त्यस अघिका दुई वर्षमा पनि समस्या परेको थियो ।

गत वर्ष पनि बोर्डको बजेट माघ महिनामा मात्रै स्वीकृत भएको थियो । बजेट स्वीकृती नै ढिलो हुँदा र यस अघि अल्झिएका विविध समस्याका कारणले बोर्डले गत आर्थिक वर्ष २०७२/०७३ को बजेट पनि ७० प्रतिशतभन्दा खर्च गर्न नसकेको जानकारी दिएको छ । समयमा नै बजेट नआउँदा बोर्डको प्रवद्र्धन तथा पर्यटकीय विकासले गति लिन सकेको छैन ।