एक कित्ताको एक हजार २० रुपैयाँ
काठमाडौः युनिलिभर नेपाल लिमिटेडले लगानीकर्तालाई एक सेयरको एक हजार २० रुपैयाँ लाभांश दिने भएको छ । यसआधारमा युनिलिभरको एक सय कित्ता सेयर हुनेले एक लाख दुई हजाररुपैयाँ नगद लाभांश हात पार्नेछन् । हाम्रो पुँजी बजारमा यो सबैभन्दा आकर्षक लाभांश हो ।
युनिलिभर नेपाल लिमिटेडको साउन २८ मा बसेको सञ्चालक समिति बैठकले गएको आर्थिक वर्षको नाफाबाट एक सेयर बराबर एक हजार २० रुपैयाँ नगद लाभांश दिने प्रस्ताव गरेको हो ।
यसआधारमा एक सय रुपैयाँमा साधारण सेयर भरेर पारेका लगानीकर्ताले एक हजार गुणाभन्दा बढी लाभांश पाउने भएका हुन् । यो लाभांश नेपाली पुँजी बजारको इतिहासमै सबैभन्दा उच्च हो ।
यति धेरै लाभांश दिने अन्य कम्पनी हामीकहाँ छैन । अघिल्लो वर्ष पनि युनिलिभरले एक कित्ता सेयरको नौ सय ९०रुपैयाँ नगद लाभांश दिएको थियो । कम्पनीले लाभांश प्रस्ताव पारित गर्न आगामी असोज ५ मा साधारण सभा बोलाएको छ । साधारण सभाले पारित गरेपछि मात्र लाभांश वितरण गर्न पाइन्छ ।
युनिलिभरको सेयर भाउ पनि नेपाल स्टक एक्सचेन्जमा सूचीकृत दुई सय ३९ कम्पनीमध्ये सबैभन्दा महँगो छ । विगतमा यो कम्पनीको भाउ ३५ हजाररुपैयाँ कटिसकेको छ ।
स्टक एक्सचेन्जमा युनिलिभरको पछिल्लो कारोबार प्रतिकित्ता ३३ हजार सात सय ८० रुपैयाँमा भएको थियो । हेटौंडामा कार्यालय रहेको यो कम्पनीको चुक्ता पुँजी नौ करोड २० लाख ७० हजाररुपैयाँ रहेको छ ।
युनिलिभरको मात्रै बजार पुँजीकरण हिसाब गर्दा ३१ अर्ब १० करोड १२ लाख ४६ हजार रुपैयाँ छ ।
प्रतिक्रिया दिनुहोस !
