अर्थसचिवको खान्की तारे होटेलको !
काठमाडौं: सचिवले तलब भत्तावापत राज्यकोषबाट तलब÷भत्तामा बुझ्ने ५१ हजार रुपैयाँ हो । यसबाहेक इन्धनमा मासिक एक सय लिटर पेट्रोलको सुविधा हुन्छ । अर्थसचिव लोकदर्शन रेग्मीको खान्कीमै योभन्दा बढी खर्च भएको हुनसक्छ । अर्थसचिव लागि खान्की तारे होटेल द्वारिकाजबाट मगाइने भएकाले यस्तो अनुमान गरिएको हो ।
अति व्यस्त हुने अर्थसचिवका लागि कार्यालय समय १०–५ बजे भन्ने हुन्न । कुर्सीमा बस्ने जोपनि बिहानै मन्त्रालय आउने र साँझ अबेरसम्म बस्ने गर्छन् । रेग्मी पनि त्यसै गर्छन् । अझ उनी त मन्त्रालयका निकटस्थलाई लिएर डिनरमा द्वारिकाज जाँदा पनि फर्केर मन्त्रालयमा आई राति १० बजे सिंहदरबारभित्रै 'इभनिङ वाक' गर्छन् । बिहान ब्रेकफास्टदेखि डिनरसम्मको खानेकुरा द्वारिकाजबाटै आउँछ । 'सचिवज्यूलाई सुप खान मन लागे पनि द्वारिकाजमै अर्डर हुन्छ', मन्त्रालयका एक कार्यालय सहयोगीले भने ।
तत्कालीन सचिव रामेश्वर खनाल र शान्तराज सुवेदी क्यान्टिनकै चाउचाउ खान्थे, कहिलेकाँही सुक्खा रोटी÷तरकारी । कृष्णहरी बाँस्कोटाले चाउचाउबाहेक सायदै खाए, चाउचाउमा एउटा अन्डाचाहिँ चाहिन्थ्यो । 'अहिलेका सचिवलाई ब्रेड पनि द्वारिकाकै नभई नहुने', ती सहयोगीले भने । सहकर्मीसँग सचिवले 'म सानोतिनो मान्छे हैन, सानोतिनो ठाउँको खाँदिन' बारम्बार भन्ने गर्छन ।
उनले दोहोर्याउने अर्को कुरा हो– सानो चित्त बनाउन हुँदैन, हामीले एकाध लाखको खाएर फरक पर्दैन । बजेट लेखनका क्रममा संलग्न कर्मचारीलाई पनि मन्त्रालयमै खाना खुवाउने चलन छ । अघिका वर्ष क्यान्टिनकै खाना सर्व हुन्थ्यो । यसपालि द्वारिकाजका साथै कहिलेकाँही बबरमहल रिभिजिटेडबाट मगाइएको थियो । सचिवले बजेटसम्बन्धी छलफल पनि धेरै होटेलमै गरे । उनले मन्त्रालयबाहिरका पनि धेरैसँग बजेटको सुझाव संकलन गरेका थिए जुन पाँचतारे होटेलमै भए ।
अर्थसचिव लोकदर्शन रेग्मीको खान्कीमै तलबभन्दा बढी खर्च भएको हुनसक्छ । उनका लागि खान्की तारे होटेल द्वारिकाजबाट मगाइने भएकाले यस्तो अनुमान गरिएको हो ।
'यसैले यसपालि बजेटको आकारमात्र होइन, बजेट लेखनको खर्च पनि चुलियो,' स्रोतले भन्यो । तर, अर्थ मन्त्रालयको स्कुलिङचाहिँ साधारण खर्च घटाउनुपर्छ, यसका लागि पहिला मन्त्रालयनै उदाहरणीय हुनपर्छ भन्ने थियो ।
द्वारिकाजमा डिनरका साथै इभनिङ वाकमा पनि उनलाई साथ दिने बजेट महाशाखा प्रमुख रामशरण पुडासैनी, संस्थान समन्वय महाशाखा प्रमुख हरिशरण पुडासैनी, अनुगमन महाशाखा प्रमुख मुकुन्द पौडेल, कानुन महाशाखा प्रमुख चिरञ्जीवी खनाल र केन्द्रीय बजेटका प्रमुख (उपसचिव) थानप्रसाद पंज्ञेनी साथै हुन्छन् ।
डिनरमा रक्सी सेवन गर्न परे ब्लु लेवल सर्व हुन्छ । बाहिर २५ हजार रुपैयाँ पर्ने ब्लु लेवलको द्वारिकाजमा ६० हजार प्लस पर्छ । सचिवले तक्मा पाएको दिनचाहिँ मन्त्रालयका सबै सहसचिवलाई द्वारिकाजमा कक्टेल डिनर दिइएको थियो, ब्लुलेवल सर्व गरिएको थियो ।
अर्थमन्त्री विष्णु पौडेलले स्याङजामा एकै गाउँका रेग्मीलाई अर्थमा ल्याएका थिए । सचिवले सिस्टममा चल्नु पर्नेभन्दै सहसचिवलाई पनि मन्त्रीलाई सोझै नभेटन निर्देशन दिएका थिए । मन्त्रीमात्र हैन निकटस्थ मन्त्रालयकै सहसचिवले पनि सचिव रेग्मीलाई भेट्दैन थिए । विभागीय प्रमुखले पनि भेट्न घन्टौं कुर्न पथ्र्यो । अर्थमन्त्री पौडेलले अर्थ बुझेका थिएनन, यसैले सचिवले जे भन्यो मान्थे ।
एकजना विभागीय प्रमुख भन्छन, 'इभनिङ वाकमा उहाँको पछिपछि हिँड्दै आफ्ना कुरा राख्नपर्ने सायद उहाँको चाहना हुन्थ्यो ।' पूर्वमुख्यसचिव लीलामणि पौडेल खर्च कटौतीका लागि कार्यविधिनै बनाइएको र खर्चको प्रत्येक बिल वेबसाइटमा राख्नुपर्ने बनाइएको थियो भन्छन् । उनी भन्छन्, 'गोष्ठी÷छलफल सरकारी हलमै गर्नुपर्ने भनिएको थियो । 'पाँचतारे होटेलमा गरिएको खर्चको बिल सार्वजनिक गर्नुपछ ।'