पुनर्संरचना आयोग भंग गर्न माग

काठमाडौंः कांग्रेसका सांसदहरूले स्थानीय तहको पुनर्संरचना गर्न गठित आयोगद्वारा प्रस्तावित खाका अव्यावहारिक भएको भन्दै उक्त आयोग भंग गर्न माग गरेका छन् ।

व्यवस्थापिका संसद्को बुधबारको बैठकमा कांग्रेसका सांसदहरूले जनताको आवश्यकता नहेरी आयोगले स्थानीय तहको खाका पेस गरेको भन्दै आक्रोश पोखेका हुन् । कांग्रेस सांसद जीवनबहादुर शाहीले आयोगद्वारा प्रस्तावित खाकाले जनताले सेवाभन्दा सास्ती पाउने दाबी गरे । ‘यो आयोगले घरघरमा झगडा गराउन खोज्यो,’ शाहीले भने, ‘जनताको आवश्यकता नहेरी संख्या तोक्ने काम भयो । आयोग भंग गर्नुपर्छ ।’

हाललाई पुरानै संरचनाअनुसारको स्थानीय निकाय निर्वाचन गर्नुपर्ने र नयाँ आउने जनप्रतिनिधिको सल्लाहमा स्थानीय तह बनाइनुपर्ने उनको सुझाव थियो । कांग्रेसका अर्का सांसद ललितजंग शाहीले आयोगद्वारा प्रस्तावित संख्या अव्यावहारिक भएको भन्दै जनताले झन् सास्ती पाउने गरी काम गर्न नहुने बताए ।
यस्तै विभिन्न दलका सांसदहरूले काभ्रे, बैतडीलगायतका जिल्लामा हालै भएका सडक दुर्घटनाको मुख्य कारण सिन्डिकेट भएको भन्दै त्यसलाई खारेज गर्न माग गरे ।

एमालेका मानप्रसाद खत्रीले सिन्डिकेटका कारण थोत्रा गाडी चलाउँदा दुर्घटना बढ्दै गएको बताए । कांग्रेसका तीर्थबहादुर लामाले काभ्रेमा बस दुर्घटनाको मुख्य कारक सिन्डिकेट भएको भन्दै सडक दुर्घटनाको जिम्मा सरकारले लिनुपर्ने बताए ।

एमालेका विदुर सापकोटा सडकको अवस्था र व्यवसायीको सिन्डिकेटका कारण काभ्रेमा बस दुर्घटना भएको भन्दै सरकारले अविलम्ब सिन्डिकेट हटाउनुपर्ने बताए ।

एमाओवादीका जनकराज जोशीले राजनीतिक दलको योगदानमा आधारित पैसा राज्यले दिने व्यवस्था गर्नुपर्ने तर्क गरे । ‘सरकारले पैसा दिने हो भने चन्दा उठाउने, असुली गर्ने काम अन्त्य भई दलहरूको स्वच्छता कायम हुन्छ,’ जोशीले भने ।