भारत नेपालको विकास र शान्ति हेर्न चाहन्छः मुखर्जी
काठमाडौँ: भारतीय राष्ट्रपति प्रणव मुखर्जीसँग उपप्रधानमन्त्री एवम् गृहमन्त्री विमलेन्द्र निधिले भेटवार्ता गरेका छन् ।
प्रधानमन्त्री पुष्पकमल दाहाल ‘प्रचण्ड’को विशेष दूतका रूपमा भारत जानुभएका उपप्रधानमन्त्री विमलेन्द्र निधिले शुक्रबार नयाँ दिल्लीमा राष्ट्रपति मुखर्जीसँग भेटवार्ता गरेको निधिका स्वकीय सचिव विश्वास विक्रमले जानकारी दिए ।
भेटमा भारतीय राष्ट्रपति मुखर्जीले भारतले सदैव नेपालमा शान्ति, स्थिरता र विकास भएको हेर्न चाहेको बताएका छन् । भेटमा उपप्रधानमन्त्री निधिले नेपालका राष्ट्रपतिका तर्फबाट भारतीय राष्ट्रपतिलाई पठाएको नेपाल भ्रमणको निमन्त्रणा पत्र हस्तान्तरण गरेका छन् ।
साथै राष्ट्रपति विद्यादेवी भण्डारीको भारत भ्रमणका बारेमा समेत कुराकानी भएको छ । यसअघि राष्ट्रपति भण्डारीको भारत भ्रमण अन्तिम समयमा स्थगन भएको थियो ।
शुक्रबार दिनभरको उच्चस्तरीय भेटघाट र छलफलमा भारतीय उच्च अधिकारीले उपप्रधानमन्त्री निधिलाई नेपाल सरकारले संविधान संशोधन र मधेसीका माग सम्बोधन सम्बन्धमा गरेका कार्यको प्रशंसा गर्नुभएको स्वकीय सचिव विक्रमको भनाइ छ ।
उपप्रधानमन्त्री निधिसँग भारतीय अधिकारीको भेटघाट र उच्चस्तरको छलफलपछि निकट भविष्यमा राष्ट्रपति भण्डारी र प्रधानमन्त्री दाहालको भारत भ्रमण तथा भारतीय राष्ट्रपति मुखर्जी र प्रधानमन्त्री नरेन्द्र मोदीको नेपाल भ्रमणबारे छलफल भएको स्वकीय सचिव विक्रमले जानकारी दिए ।
उपप्रधानमन्त्री निधिले शुक्रबार नै यसअघि भारतीय गृहमन्त्री राजनाथ सिंह र विदेश मामिलामन्त्री सुष्मा स्वराजसँग भेटघाट गरेका थिए । गृहमन्त्री निधिले शनिबार बिहान भारतीय प्रधानमन्त्री मोदीसँग भेटघाट गर्ने बताइएको छ । भेटका अवसरमा उपप्रधानमन्त्री निधिले प्रधानमन्त्री दाहालको भारत भ्रमणका बारेमा छलफल गर्नेछन् ।
नयाँ सरकार गठनपछि प्रधानमन्त्री दाहालको विशेष प्रतिनिधि पठाउने सरकारको निर्णयानुसार उपप्रधानमन्त्री निधि दुई देशबीचको उच्च भ्रमणको तयारी तथा राजनीतिक भेटघाटका लागि बिहीबार भारत प्रस्थान गरेका हुन् ।
प्रतिक्रिया दिनुहोस !
