तीज गीतमा बेचबिखनको विरोध
सन्धिखर्कः
ललाउँदै फकाउँदै बिहे गर्छु भनेर
बम्बैमा बिक्री गर्छन् पैसा गनेर ।
यी शब्द कुनै कविका होइनन् । यी जिल्लाको किमडाँडा आयोजित तीजगीत प्रतियोगितामा स्थानीय आमा समूहका सदस्यले गाएको गीतका शब्द हुन् । उनीहरूले ललाइफकाइ बिहे गर्छु तथा राम्रो नोकरी लगाइदिन्छु भनेर बिहे गर्ने तर पछि बम्बै लगेर बेच्ने गरेको पीडा गीतमा बोलेका थिए ।
अभिभावकले जबर्जस्ती बालविवाह गरिदिने र दाइजोका नाममा महिलामाथि हुने हिंसाको पनि उनीहरूले गीतमै विरोध गरे । समाज बदल्न महिला पुरुष एक नभएसम्म नहुने उनीहरूले सन्देश दिए । नारी र पुरुष एक रथका दुई पाङ्ग्रा हुन् भन्ने भनाइलाई सार्थक बनाउन दिदीबहिनी र आमाहरूले आग्रह गरे ।
महिला पुरुष समान भन्ने व्यवहारमा आएन ।
अझै पनि यो समाजले मुक्ति पाएन ।
महिला र पुरुष माथि हुने हिंसाका बारे पनि उनीहरूले गीत गाए । पहिलेपहिलेका तीज गीतमा माइत जान नपाएका, सासूले हेलाँ गरेका र दुःख पाएका गीत गाउने महिलाका तीजगीत पनि परिवर्तन भएका छन् ।
लालीगुराँस महिला बचत तथा ऋण सहकारी संस्था किमडाँडाले आयोजना गरेको खुल्ला तीजगीत प्रतियोगितामा गाउँका आमा समूहका दिदीबहिनीले चेतनामूलक गीत गाएका हुन् । उनीहरूले तीजगीतमार्फत नै संविधान कार्यान्वयनका लागि खबरदारी गर्न पनि आग्रह गरे ।
१२ समूहले भाग लिएको तीजगीत प्रतियोगितामा मिलन महिला समूह प्रथम भएको छ । प्रथम, द्वितीय र तृतीयलाई क्रमशः पाँच हजार, ३५ सय र २५ सय नगद प्रदान गरिएको छ ।
प्रतिक्रिया दिनुहोस !
