कांग्रेसबाट मन्त्री चयन बिहीबारसम्म

काठमाडौं : कांग्रेसले सरकारमा सहभागी हुने नेताहरूको चयन गर्न अझ केही दिन लगाउने भएको छ । पार्टीको भागमा परेका १३ मन्त्रालयमध्ये गृह र भौतिक पूर्वाधार मन्त्रालयमा मात्र मन्त्री नियुक्त भएका छन् ।

बाँकी ११ मन्त्री र केही राज्यमन्त्री सरकारमा पठाउने विषयमा छलफल गर्न मंगलबार पार्टी संसदीय दलको बैठक बस्दैछ । पार्टीले बुधबार वा बिहीबारसम्म सरकारमा जाने मन्त्रीको टुंगो लगाउनेछ ।

कांग्रेस सभापति शेरबहादुर देउवा आगामी शुक्रबार उपचारका लागि सिंगापुर जान लागेकाले बिहीबारसम्ममा सरकारमा मन्त्री सहभागी गराउने गरी छलफल भइरहेको पार्टी उच्च स्रोतले दाबी गरेको छ । देउवा निकट स्रोतका अनुसार सकेसम्म ११ मन्त्री र पाँच राज्यमन्त्री एकैपटक पठाउने गरी छलफल जारी छ । ‘छिटोमा बुधबार नभए बिहीबारसम्ममा कांग्रेसबाट मन्त्रीहरू सरकारमा सहभागी हुन्छन्’, एक नेताले अन्नपूर्णसँग भने, ‘मन्त्री चयनका लागि आन्तरिक छलफल जारी छ ।’

नेता रामचन्द्र पौडेलले सरकारका सहभागी हुने चारजनाको नाम देउवालाई पठाइसकेका छन् । अझै एकजना थप मन्त्री पाउनुपर्ने उनको दाबी छ ।मन्त्रीको आकांक्षी बढी भएपछि देउवाले दुई चरणमा चयन गर्ने भएका छन् । नौ महिनापछि आफ्नो नेतृत्वमा सरकार गठन हुने लिखित सहमति सरकारको नेतृत्व गरेको माओवादी केन्द्रसँग भएकाले यसपटक समेटिन नसकेकालाई अर्को सरकारमा सहभागी गराउने उनको तयारी छ ।

स्रोतका अनुसार देउवाले सरकारमा सबै पक्षलाई मिलाएर पठाउने तयारी गरेका छन् । अर्जुननरसिंह केसी, बालकृष्ण खाँड, प्रकाशशरण महत, जीवनबहादुर शाही, सीतादेवी यादव, दीपक गिरी मन्त्री हुने लगभग निश्चित जस्तै छ । त्यस्तै भरत शाह, मीन विश्वकर्मा, नवीन्द्रराज जोशी र नेता कृष्णप्रसाद सिटौलाको सिफारिसमा भीमसेनदास प्रधान, सुधीरकुमार शिवाकोटी वा गगन थापामध्ये एकजना पनि मन्त्री हुने सम्भावना छ । नेता खुमबहादुर खड्काको सिफारिसमा शंकर भण्डारी वा मोहनबहादुर बस्नेत मन्त्री हुने सम्भावना छ ।

जनजातिबाट सूर्यमान गुरुङ वा भीष्मराज आङदम्बेमध्ये एकजना मन्त्री हुने सम्भावना छ । केसीले शिक्षा वा सहरी विकास, खाँडले रक्षा, महतले परराष्ट्र र गिरीले पर्यटन मन्त्रालय पाउने सम्भावना छ । अन्य मन्त्रालय पाउनेको टुंगो लागेको छैन । राज्यमन्त्री हुनेमा ध्यानगोविन्द रन्जित, दीर्घराज भाट, सुजाता परियार, किरण यादव अब्दुल रज्जाकलगायतको नाम चर्चामा छ ।

वर्तमान सरकारको भागबन्डाअनुसार कांग्रेसको भागमा रक्षा, परराष्ट्र, सहरी विकास, सिँचाइ, श्रम, पर्यटन, शिक्षा वा स्वास्थ्यमध्ये एक, सामान्य प्रशासन, युवा तथा खेलकुद, वन मन्त्रालय परेको छ ।