जिल्लामा सुझाव बुझाउन एमालेको निर्देशन

काठमाडौंः स्थानीय निकायको पुनर्संरचनाबारे जिल्ला तहमा सुझाव पेस गर्न एमालेले आफ्ना मातहत समितिहरूलाई निर्देशन दिएको छ । स्थायी समितिको जारी बैठकले यस्तो निर्देशन दिएको हो ।

एमालेको जिल्ला तहबाट स्थानीय निकायको संख्या आयोगले दिएको प्रतिवेदनभन्दा बढाउनुपर्ने पक्षमा सुझाव आए पनि केन्द्रले भने यस विषयमा जिल्ला तहबाट सुझाव मागेको छ ।

‘संविधानको प्रावधानअनुसार स्थानीय तहहरूको संरचना गर्न स्थानीय तह पुनर्संरचना आयोग क्रियाशील छ । हाम्रो पार्टी उक्त आयोगले संविधानको व्यवस्था र आफूलाई तोकिएको मापदण्ड एवम् कार्यसर्तअनुसार छिटोभन्दा छिटो काम सम्पन्न गरी प्रतिवेदन प्रस्तुत गरियोस् र पूर्ववर्ती सरकारले प्रस्तुत गरेको कार्यतालिकाअनुसार स्थानीय निर्वाचन होस् भन्ने मान्यतामा दृढ छ ।

स्थानीय तहहरूको पुनर्संरचना गर्दा जनभावनालाई ध्यानमा राख्दै संविधानले व्यवस्था गरेका अधिकारको अभ्यास गर्नसक्ने गरी उपयुक्त संख्यामा स्थानीय तह निर्धारण हुनुपर्छ भन्ने हाम्रो मान्यता छ ।

स्थायी कमिटी बैठकले आआफ्नो जिल्लामा स्थानीय तहको पुनर्संरचनासम्बन्धी सुझाव आयोगसमक्ष अविलम्ब प्रस्तुत गर्न स्थानीय पार्टी कमिटीहरूलाई आह्वान गरेको छ’, बैठकको निर्णयमा उल्लेख छ ।

बैठकले केन्द्रीय कमिटीको सातौं बैठक आगामी असोज ५-७ मा काठमाडौंमा आयोजना गर्ने निर्णय गरेको छ । त्यस बैठकका लागि अध्यक्षका तर्फबाट प्रस्तुत हुने राजनीतिक प्रतिवेदन, महासचिवका तर्फबाट प्रस्तुत हुने संगठनात्मक प्रतिवेदन, केन्द्रीय निकायका प्रतिवेदन तथा पार्टीको भाबी कार्ययोजनालगायतका कार्यसूची तय गरिएका छन् ।

बैठकले विभिन्न पार्टीबाट एमालेमा समाहित हुन चाहने व्यक्तिहरूसँग छलफल गरी आवश्यक निर्णय गर्न र उपयुक्त जिम्मेवारी दिने सम्बन्धमा सुझाव पेस गर्न महासचिव ईश्वर पोखरेलको संयोजक तथा प्रदीप ज्ञवाली, पृथ्वीसुब्बा गुरुङ, गोकर्ण बिष्ट र राधाकृष्ण मैनाली सदस्य रहेको कार्यदल गठन गरी जिम्मेवारी दिने निर्णय गरेको छ । कार्यदलले अन्य पार्टीबाट आएका र आउने व्यक्तिहरूलाई पार्टीमा उपयुक्त जिम्मेवारी दिने अधिकार दिएको छ ।