दक्षिण कोरियामा फुटबल खेलेर चर्चा बटुल्दै नेपाली युवा
सोलः नेपाली युवा मनिष डाँगी दक्षिण कोरियामा फुटबल खेलेर चर्चा बटुलिरहेका छन् । डाँगीले एकेडेमी स्तरको फुटबल प्रतियोगितामा उत्कृष्ट प्रदर्शन गर्दै आएका छन् । सिन्हंग फुटबल एकेडेमीबाट खेल्दै आएका मनिषले ७० भन्दा बढी खेलमा ४५ गोल गरेका छन् ।
सिन्हंग फुटबल एकेडेमीको घरेलु मैदान दोंग्दचौंनमा डाँगीले अभ्यास खेल खेल्दै आएका छन् । विद्यालय स्तरको प्रतियोगिताबाट उत्कृष्टलाई कोरियाको राष्ट्रिय लिगमा खेल्नका लागि छनौट गरिने प्रावधान छ ।
कोरियाको सबैभन्दा ठुलो फुटबल लिग प्रतियोगितालाई ‘के लिग’ भनिन्छ । साताको छ दिन बिहान एक र साँझ दुई घण्टा प्रशिक्षण हुने गरेको डाँगीले बताए । प्रशिक्षण कोरियाका पूर्वखेलाडी र फिफामा अनुबन्धित भएका प्रशिक्षकले दिने गरेका छन् ।
प्रत्येक शनिबार विद्यालय स्तरको हुने छुमाल लिगमा पनि डाँगी खेल्दै आएका छन् । विद्यालय स्तरको प्रतियोगितामा छुमाल लिगलाई महत्वका साथ हेर्ने गरिन्छ । उनी दुई बर्षदेखि उक्त एकेडेमीबाट खेल्दै आएका छन् ।
डाँगीले कोरियाका एकेडेमी स्तरको प्रतियोगिता साथै चीन र जापानका एकाडेमी स्तरका खेलहरुको प्रतिस्पर्धामा पनि सहभागी भएका छन् ।
एकेडेमीले उनलार्य खाने र बस्ने सबै सुविधासहित अनुबन्ध गरेको छ । अभ्यासका क्रममा खेलाडीलाई भौतिक सुविधाहरु फिटनेस सेन्टर, स्विमिंग पुल तथा रिकोभरी सेन्टरको व्यवस्था भएको उनले बताए । जाडो र गर्मी बिदाको समयमा एक महिनाको लागि एकेडेमीले फुटबल अभ्यासका अन्यत्रका शहरमा खेलाउने गरिएको छ ।
कोरियन फुटबलमा आवद्ध एकेडेमीमध्ये सिन्हंग फुटबल एकेडेमीलाई माथिल्लो स्तरको एकेडेमीका रुपमा पनि लिने गरिन्छ । राष्ट्रिय टिमका फुटबल खेलाडी किम दु हयून सिन्हंग फुटबल एकेडेमीका उत्पादन हुन । १५ बर्षीय डाँगीले नेपाल रहेको समय जेम्स स्कुलमा अध्ययन र खेलअघि बढाएका थिए । माध्यमिक तहमा अध्ययन गर्दै गरेका डाँगीका बुबा कोरियामा रेस्टुरेन्ट व्यवसाय गर्छन् ।
प्रतिक्रिया दिनुहोस !
