चित्रका निर्दोष आत्माहरू
काठमाडौः ठूलो रूख, हाँगाहाँगामा झुन्डिएका मान्छे आकृतिका रगतका डल्ला । उनीहरूसँगै कति निर्दोष आत्माहरू झुन्डिए होलान् । बढ्दै गएको गर्भपतनको मार्मिक दृश्य प्रस्तुत भएको यस चित्रमा कलाकार लक्ष्मण लामाले आफ्ना भावना पोखेका छन् ।
कति आमाले बाध्य भएर आफ्नै जिन्दगी जोखिममा पारेर पेटभित्रै सन्तान मारेका छन् । कतिका लागि यो रहर पनि हुन सक्छ । जे भए पनि कुनै हुर्कंदै गरेको जीवनलाई संसार देख्नबाटै च्युत गराउने गलत कामप्रतिको प्रहार हो, यो चित्र ।
बालदिवसको अवसरमा बुधबारदेखि बौद्धस्थित तारागाउँ म्युजियममा चलिरहेको चित्रकला प्रदर्शनी ‘सँगसँगै’मा लक्ष्मण, अनिशा महर्जन र सुनिल प्रधानसँगै १२ जना बालकलाकारका चित्र राखिएका छन् ।
गोलाकारभित्र आधा भागमा भ्रूण, आधा भागमा महिलाहरू छन् । भ्रूणहरू भएको भागमा राम्रा कुराको संकेत गर्दै सेतो थोप्ला, महिला भएको भागमा खराब विषयको संकेत गर्ने कालो थोप्ला ! चित्रमा एउटा जीवन गए पनि अर्को जीवन बाँचिरहेको देखाउन खोजिएको छ ।
एउटा फोहोर खुट्टाबाट सुन्दर कमल फुलिरहेको चित्रमा अनिशाले दर्शन प्रस्तुत गरेकी छन् । सुन्दर कमल जसरी फोहोरमा फूल्छ, त्यसैगरी फोहोरी देखिएका सडक बालबालिकाभित्र सुन्दर प्रतिभा हुन सक्छ । उनको चित्रमा जति मार्मिकता छ, त्यति नै सफा र सुन्दर कुची चलेको देखिन्छ । दुःखी अनुहार लिएर टाउकोमा इँटा बोकेको बालकको चित्रले मजदुर बालबालिकाको पीडा देखाएको छ ।
सुनीलका चित्र पनि उत्तिकै शक्तिशाली छन् । बालबालिका नै सम्पत्ति हुन् भनेर उनले चित्रमार्फत देखाउन खोजेका छन् । लेट्स आर्ट समूहले आयोजना गरेको प्रदर्शनी शनिबारसम्म चल्नेछ ।
बालबालिकाले पेन्सिल कलर, कोलाज, वाटर कलरलगायतका माध्यमका चित्र बनाएका छन् । बालबालिकाको २४ वटा र अरू कलाकारको १० वटा गरी कुल ३४ वटा चित्रहरू प्रदर्शनीमा राखिएको छ । बालबालिकाको पहिलो प्रदर्शनी भएकाले उनीहरूको चित्र बिक्रीका लागि राखिएको छैन । अरू चित्रहरूको मूल्य ३५ हजारदेखि ८८ हजार रुपैयाँसम्म तोकिएको छ ।
प्रतिक्रिया दिनुहोस !
