कुकुरले टोकेका दुई जनाको मृत्यु
रोल्पाः कुकुरले टोकेका रोल्पाका दुई जनाको मृत्यु भएको छ । सिर्प ५ सिमेगिठाका ६५ वर्षीय करे पुनमगर र ५३ वर्षीय हिराबहादुर पुनमगरको मृत्यु भएको हो ।
भदौ ९ गते सोही गाउँका श्यामे पुनमगरको घरपालुवा कुकुरले गाउँलेलाई टोकेको थियो । स्थानीय नेमबहादुर खड्का अनुसार एकै दिन गाउँका ६ महिलासहित ११ पुरुष र ६ वटा चौपायलाई टोकेको थियो ।
वहुला कुकुरले टोकेपछि घाइते केहीले सुलिचौर रुइनिबाङस्थित नेशनल मेडिकलमा रेविजवरुद्धको भ्याक्सिन लगाएको घाइते बताउछन् । घाइते केहीले सोही मेडिकलबाट भ्याक्सिन मगाएर गाउँकै क्लिनिकमा लगाएका छन् ।
गाउँलेलाई टोक्ने कुकुरलाई गाउँलेले उसैबेला मारेका थिए । घटनाबारे प्रहरीलाई जानकारी नगराएका गाउँलेको कुकुर धनीले नै घाइतेले लगाउने भ्याक्सिन र उपचार खर्च व्यहोर्ने निर्णय गरेका थिए ।
भ्याक्सिन लगाए पनि घाइते मर्न थालेपछि गाउँले पुरै त्राहीमाम बनेका छन् । करे पुनमगरको मंगलबार घरमै मृत्यु भएको हो । उनको छातीमा टोकेको थियो ।
घाँटीमा टोकेर घाइते हिराको असोज २ गते वुटवल उपचारका लागि लैजादै गर्दा बाटोमा मृत्यु भएको हो । नेशनल मेडिकलबाट नै थप उपचारको लागि उनलाई बुटवल रेफर गरेको थियो । रेविजविरुद्धको पाँच सुई लगाई सकेका उनले १ सुई मात्र लगाउन बाँकी रहेको गाउँलेले बताए ।
स्तनमा टोकेर घाइते सोबी घर्ती विरामी अवस्थामा छिन् । स्थानीय समाजसेवी समेत रहेका खड्काका अनुसार घाइतेले मुखबाट ¥याल छाड्ने, शरीर काम्ने र हुक्कहुक्क आवाज निकाल्ने गरेपछि मृत्यु हुने गरेको छ ।
आफुसँगै घाइते भएकाको उपचारको क्रममा मृत्यु भएपछि घाइते त्रासमा छन् । गाउँलेका अनुसार दुई गाई र दुई बाख्रा मरेका छन् ।
कुकुरले टोकेकाको मृत्यु हुनथालेपछि गाउँलेले ४५ कुकुर मारेका छन् । सर्वपक्षीय भेला गरी सबैले घरमा पालिएका कुकुर मार्ने निर्णय समेत गरेका छन्
प्रतिक्रिया दिनुहोस !
