उमेरले बूढो भइँदैन
काठमाडौं: बलिउडकी चर्चित सेलिब्रेटी हेयर स्टाइलिस्ट सिल्भी रजर्स तीनदिने नेपाल भ्रमणमा आएकी छन् । कमलादीस्थित डलिज एक्जुकेटिभ क्रियसन्सको २० औं वार्षिकोत्सव मनाउने क्रममा उनी नेपाल आएकी हुन् । सिल्भीले तीनदिने नेपाल बसाइमा धेरै क्लाइन्टको कपालको शैलीलाई सुन्दर बनाइदिने भएकी छन् ।
हेर्दाहेर्दा केही मिनेटमै आफ्नो कपाल काटेर त्यसलाई ब्लो ड्राई गरी अनुहारलाई सुहाउँदो हेयर स्टायल बनाइदिएकोमा फेसन डिजाइनर एवं इन्टिरियर डिजाइनर रोशन भट्टराई दंग परिन् । उनले भनिन्, ‘साँच्चै उहाँको हातमा जादु रहेछ ।’
सिल्भीको यही सीपले आकर्षित भएर धेरै नेपाली क्लाइन्टहरू उनीसँग कपाल कटाउनकै लागि दिल्लीसम्म पुग्ने गरेका छन् ।
तिनै क्लाइन्टलाई भेटेर उनीहरूलाई सुन्दर बनाउने चाहनाले उनलाई १५ वर्षपछि पुनः नेपालसम्म डोर्यायो । सत्तरीको दशकको अन्तिमतिर बनेका चलचित्रमा उनले नै नायिकाहरूको कपाल बनाइदिने गर्थिन् । त्यतिबेलाका प्रविन बाबी, जिनत अमान, हेमा मालिनी, पद्मिनी कोलापुरीलगायत चर्चित नायिकाका हेयर स्टाइलिस्ट उनी नै थिइन् ।
सन् १९८८ ताका भारतको राजधानी दिल्लीमा पहिलोपटक फेसन शो गराउने श्रेय पनि उनलाई नै जान्छ । त्यतिबेला निकै चर्चामा आएको उनको फेसन शोका राहुल देवलगायतका मोडलहरू अहिले आएर हजुरबुबा हजुरआमासम्म भइसकेका छन् ।
सिल्भी भने आफूलाई अझै जवान नै छु भन्न रुचाउँछिन् । ‘म भर्खर २१ वर्ष लागेँ, जवान देखिन स्कर्ट लगाउने गर्छु’, उनले भनिन्, ‘३१ लागेपछि काम छाडेर आराम गर्ने बारेमा सोचौंला ।’ उनका अनुसार बुढ्यौली उमेरले होइन सोचाइले आउने कुरा हो । आफ्नो काम गर्ने उमेर पुग्यो भनेर नबसी निरन्तर काममै खटेकाले यत्तिको फुर्तिलो हुन सकेको उनको अनुभव छ । आज पनि उनी नथाकी दिनमा १५ जनासम्मको कपाललाई विभिन्न आकर्षक स्टायल दिन सक्छिन् ।
उनी आफ्नो पेसालाई सन्तान सरह माया गर्छिन् र काम गर्दा रमाएर गर्छिन् । आमाको यही सिर्जनशील पेसाबाट प्रेरित भएर उनका दुई छोराहरू तुसार मल्लिक र क्यासिन मल्लिकले पनि यही पेसालाई रोजेका छन् । भारतभरि रहेका १६ वटा सिल्भी डिजाइनर्स सलोनमध्ये दिल्लीका सलोनहरूको जिम्मेवारी उनका छोराहरूले सम्हाल्दै आएका छन् ।
चलचित्रमा उनले अचेल निकै कम काम गर्छिन् । यसको जिम्मा उनले आफूभन्दा दस वर्ष कान्छी बहिनी यासमिन रजर्सलाई दिएकी छन् ।
कपाललाई विभिन्न स्टायल दिँदा त्यसले अनुहारको स्वरूप, कपालको टेक्सचर र डिजाइनलाई परिवर्तन गरिदिने उनको भनाइ छ । हरेक कपालको टेक्सचर फरक हुन्छ । यदि टेक्सचर नराम्रो भएमा भिटामिन, स्पालगायतका उपायद्वारा सुधार्ने उनी सुझाव दिन्छिन्। कपालको स्टायलमात्रै नभई गुणस्तर पनि सुधार्ने हुनाले उनी आफूलाई कपालको डाक्टरसमेत भन्न रुचाउँछिन् ।
कपालको स्टायलले महिलाको उमेरलाई दस वर्ष कम देखाउन सक्छ । कसैको कपाललाई स्टायल दिँदा उनको उमेर र पेसा पनि हेर्नुपर्ने उनले बताइन् । नेपाली महिलाको कपाल प्राकृतिक रूपमै सुन्दर छन् । तर त्यसलाई थोरै स्टायल दिनाले झन् सुन्दर देखिने हुनाले महान् चाड दसैंको अवसरमा आफ्नो हेयर स्टायललाई केही परिवर्तन गर्न सिल्भीले सुझाव दिइन् ।