कुटपिट गरी अपरिचित युवतीको हत्या
राजविराजः कुटपिट गरी हत्या गरिएको अवस्थामा करिब २० वर्षीया युवतीको शव शनिबार सप्तरीमा फेला परेको छ । सदरमुकाम राजविराज नजिकै बोरिया गाविस १ स्थित कोशी दक्षिण नहरमा नजिकैको चौरमा शव फेला परेको जिल्ला प्रहरी कार्यालय सप्तरीले जानकारी दिएको छ ।
मृतकको घाँटी र शरीरमा निलडाम तथा अनुहार रक्ताम्य रहेको अवस्थामा शव फेला परेको प्रहरी उपरीक्षक भिमप्रसाद ढकालले बताए । घटनाबारे गहिरो अनुसन्धान सुरु गरी अभियुक्तको खोजीकार्य भइरहेको प्रहरी उपरीक्षक ढकालले बताए ।
बलात्कारपछि हत्या भएको हुन सक्ने सम्भावना व्यक्त गर्दै अपरिचित युवतीको शवको पोष्टमार्टमका लागि धरानस्थित बिपी कोइराला स्वास्थ्य विज्ञान प्रतिष्ठान पठाइएको ढकालले जानकारी दिए । शवको साथबाट भारतीय दुई सय र नेपाली ५० रुपैयाँ भेटिएको छ ।
भारतीय बालकको डुबेर मृत्यु
त्यस्तै, दसैंका बेला प्रसिद्ध शक्तिपिठ छिन्नमस्ता र कंकालिनी भगवतीको मन्दिर दर्शन गर्न बुवाआमासँग सप्तरी आएका एक बालकको पोखरीमा डुबेर शनिबार मृत्यु भएको छ।
भारत बिहारको सुपौल जिल्ला पिप्रा पञ्चायत १ का मुनेश्वर मण्डलका छोरा पाँच वर्षीय बेदप्रकाश मण्डलको बमनगामा कट्टी ३ स्थित पोखरीमा डुबेर मृत्यु भएको सप्तरी प्रहरीले जनाएको छ ।
उनी बुवाआमासँग शनिबार मात्र बमनगामा कट्टी ३ स्थित फुपाजु राजकुमार मण्डलको घर आएका थिए । बालकको राजविराजस्थित सगरमाथा अञ्चल अस्पतालमा मृत्यु भएको हो । परिवारले धामीलाई देखाउने भन्दै अहिलेसम्म पोष्टमार्टम गर्न दिएका छैनन् ।
प्रतिक्रिया दिनुहोस !
