२२ लाख बाहिरिएपछि दसैंमा राजधानी सुनसान
काठमाडौँः दसैँ मान्नका लागि राजधानी काठमाडौँबाट लाखौँको सङ्ख्यामा सर्वसाधारण बाहिरिएपछि उपत्यका प्रायः सुनसानजस्तै बनेको छ ।
उपत्यकाका तीनवटै जिल्लाबाट २२ लाखभन्दा बढी मानिस विभिन्न गन्तव्यमा गएका छन् जसका कारण उपत्यकाका मुख्य बजार, सडक चोकका पसल बन्द छन् ।
सडकमा पातलो सङ्ख्यामा सवारी साधन गुडेका छन् । मानिसको चहलपहल पनि न्यून छ । पर्याप्त सवारी नचल्दा कामकाजी सर्वसाधारण मर्कामा परेका छन् ।
कतारबाट दसैँका लागि घर फर्केका चितवनका विश्वास केसीले काठमाडौँका विभिन्न स्थानमा आवतजावत गर्न समस्या परेको बताए ।
अनामनगरमा ट्याक्सीको पर्खाइमा रहनुभएका उनले दुई घन्टासम्म पनि सवारी साधन नपाएको गुनासो गरे ।
उपत्यका छोड्ने सर्वसाधारणभन्दा पनि विभिन्न बाध्यतामा राजधानीमा रहेका सर्वसाधारणलाई दसैँका बेला सवारी साधन, अत्यावश्यक खाद्य पदार्थ तरकारी आदि सामान किन्न र गन्तव्यमा पुग्न समस्या भएको छ ।
उपत्यकामा यात्रुको सुविधालाई मध्यनजर गरी नेपाल प्रहरी र नेपाली सेनाले विभिन्न रुटमा गाडी सञ्चालन गरिरहेको भएपनि धेरै यात्रु उक्त सेवाको पहुँचमा नभएको बुझिएको छ ।
अत्यावश्यक उपभोग्य वस्तु खरिदका लागि आवतजावतमा असहज भएको मध्यबानेश्वरका सन्दीप थापाले बताए । रासस
प्रतिक्रिया दिनुहोस !
