क्लिन्टन लागूआैषध प्रयोगकर्ताः ट्रम्प
न्युयोर्कः अमेरिकी राष्ट्रपति पदका उम्मेदवार डोनाल्ड ट्रम्पले आफ्नी प्रतिस्पर्धी हिलारी क्लिन्टनलाई लागूऔषध परीक्षण गर्न माग गरेका छन् ।
अमेरिकी राष्ट्रपति पदका लागि दुई सशक्त प्रत्याशी उम्मेदवार हिलारी रोधम क्लिन्टन र डोनाल्ड ट्रम्पबीच आगामी प्रत्यक्ष टेलिभिजन बहस कार्यक्रमभन्दा अगाडि हिलारीको परीक्षण हुनु पर्ने शनिबार ट्रम्पले माग गरेका हुन् ।
ट्रम्पले आफ्नी प्रतिस्पर्धी क्लिन्टनले यसअघि भएका संयुक्त बहस सुरु हुनुभन्दा अगाडि पनि लागूऔषध प्रयोग गरेको आरोप लगाएका छन् । बहसका क्रममा क्लिन्टनको प्रस्तुति राम्रो हुनुमा लागूऔषधको प्रभाव हुन सक्ने ट्रम्पको आरोप छ । उनले क्लिन्टनलाई मतदान नगर्न समेत आह्वान गरेका छन् ।
रिपब्लिकन पार्टीका उम्मेदवार ट्रम्पलाई यौनदुव्र्यवहारको आरोप लागिरहेका बेला ट्रम्पले क्लिन्टनलाई लागूऔषध प्रयोग गरेको आरोप लगाएका छन् । विदेशमन्त्री भएका बेला गोप्य इमेलहरूको दुरुपयोग गरेकाले आफू विजयी भएमा क्लिन्टनलाई जेल हाल्ने ट्रम्पले बताएका छन् । क्लिन्टनलाई जेल हाल्ने बताएपछि उनका समर्थकहरूले ‘क्लिन्टनलाई थुन' भन्दै नारावाजी गरेका थिए ।
पछिल्लो बहसमा सहभागी भएका बेला क्लिन्टनले लागूऔषध सेवन गरे वा नगरेको बारेमा परीक्षण गर्न पनि ट्रम्पले माग गरेका छन् । आफ्नो पनि परीक्षण गराउन आफू तयार रहेको उनले बताएका छन् ।
पोर्टस्माउथमा आयोजित एक चुनावी सभामा सम्बोधन गर्दै ट्रम्सले भने, ‘क्लिन्टन बहसका सुरुमा निकै उत्तेजित देखिएकी थिइन्, तर अन्तिममा भने निकै कमजोर देखिइन् र आफ्नो कारसम्म पुग्न पनि निकै गाह्रो भएको थियो ।'
अमेरिकी राष्ट्रपति पदका लागि दुई सशक्त प्रत्याशी उम्मेदवार हिलारी रोधम क्लिन्टन र डोनाल्ड ट्रम्पबीच एक साताअगाडि दोस्रोपटक प्रत्यक्ष टेलिभिजन बहस कार्यक्रम सम्पन्न भएको थियो । उक्त कार्यक्रमभरी नै ट्रम्प र क्लिन्टनले एकअर्कामाथि हिलो छ्याप्ने र एकअर्कालाई उम्मेदवारीबाटै सिध्याइदिनेसम्मको आक्रामक प्रयासमा लागे ।
कार्यक्रममा वर्तमान राष्ट्रपति बाराक ओबामाले अवलम्बन गरेका अमेरिकी रणनीतिहरू, इराक, सिरिया, अफगानिस्तान लगायतका मुलुकमा गरिएको सहयोगबारे पनि ट्रम्पले तीव्र आलोचना गरे । दर्शकका प्रश्नका उत्तर दिने क्रममा ट्रम्प आक्रामक भएर प्रस्तुत भए ।
ट्रम्पले हिलारीको निन्दा गर्ने क्रममा उनका पति बिल क्लिन्टन धेरै वर्षअघि एकपटक यौन काण्डमा मुछिएको घटना स्मरण गराए । हिलारीले पनि ट्रम्पले महिलाको सम्बन्धमा अतिशयोक्ति गरी बोलेको श्रव्यदृश्य (भिडियो टेप) सार्वजनिक गरिदिइन् ।
सन् २००५ मा रेकर्ड गरिएको उक्त टेपमा स्थानीय एक बसमा अमेरिकी एनबिसी टेलिभिजन कार्यक्रम प्रस्तोता बिल्ली बुस र ट्रम्पसँगै यात्रा गरिरहेका बेला कुराकानी भएको दृश्य देखाइएको थियो । कुराकानीका क्रममा ट्रम्पले तिमी चलचित्र (हलिउड) का एउटा नायक हुने हो भने तिमीले महिलालाई जे गरे पनि हुन्छ भनेका रहेछन् । ‘महिलालाई जे गरे पनि हुन्छ' सन्दर्भ झिकेर हिलारी क्लिन्टनले आरोप लगाउन थालेकी छन् ।
ट्रम्पको अभिव्यक्तिले कोही पनि महिलालाई उनको स्वीकृतिबिना अँगालोमा कस्ने वा चुम्बन गर्नेजस्ता यौनजन्य दुव्र्यवहार गरे हुन्छ भन्ने अर्थ क्लिन्टनले लगाएकी थिइन् ।
क्लिन्टनको यस अडानले दर्शकबाट समर्थन पाए र ट्रम्प तत्काल सो विगतको घटनाका लागि माफी माग्न बाध्य भए । डेढ घण्टा चलेको प्रत्यक्ष बहस कार्यक्रममा दर्शकका प्रश्नका उत्तर दिने क्रममा दुबैजनाले राष्ट्रिय तथा अन्तर्राष्ट्रिय मामिलाका धेरै विषयमाथि आ–आफ्नो धारणा व्यक्त गरे ।
प्रतिक्रिया दिनुहोस !
