ब्याडमिन्टनमा नेपाललाई पहिलो स्वर्ण

काठमाडौः नेपालले अन्तर्राष्ट्रिय ब्याडमिन्टन प्रतियोगितामा पहिलोपटक स्वर्णपदक जितेको छ । दिदी-भाइ रत्नजित र नङ्सल तामाङको जोडीले पाकिस्तानमा सम्पन्न योनेक्स सनराइज पाकिस्तान इन्टरनेसनल सिरिजमा मिश्रित युगल (मिक्स डबल्स) तर्फ पहिलो स्थान हातपारेको हो । शुक्रबार साँझ सम्पन्न फाइनलमा रत्नजित र नङ्सलको जोडीले पाकिस्तानी मेहमोना अमिर र मोहम्मद भाटीको जोडीलाई २१-१३, २१–१५ को सोझो सेटमा हराएको हो ।

प्रतियोगितामा सिरिया, बंगलादेश, पाकिस्तानसहित सात राष्ट्रको सहभागिता थियो । पाकिस्तानसँगको द्वन्द्वका कारण सबैभन्दा बलियो भारत भने प्रतियोगितामा सहभागी थिएन । अन्तर्राष्ट्रिय ब्याडमिन्टन प्रतियोगितामा यसअघि नेपाली खेलाडी मिश्रित युगलमा क्वार्टरफाइनलभन्दा अगाडि बढ्न सकेका थिएनन् । नेपाली खेलाडी अन्तर्राष्ट्रिय ब्याडमिन्टन प्रतियोगिताको फाइनलमा तीनपटक पुगे पनि उपाधि जित्न भने असफल थिए ।

२०५२ सालमा नेपालमै आयोजना भएको महेन्द्र मेमोरियल इन्टरनेसनल च्याम्पियनसिपमा नेपालका नवीनविक्रम शाह पुरुष एकलको फाइनलमा पुगे पनि उपाधि जित्न असफल भएका थिए ।
पाकिस्तानमा भएको एक अन्तर्राष्ट्रिय प्रतियोगितामा नेपालका सुमिना श्रेष्ठ र पूजा श्रेष्ठ महिला युगलको फाइनल पुगे पनि उपाधि भिडन्तमा पराजित भएका थिए । २००८ मा नेपालमै आयोजित नेपाल इन्टरनेसनल सिरिजमा पनि पूजा र सुमिनाको जोडी फाइनलमा पुगेर उपाधि भिडन्तमा पराजित भएको थियो ।

नङ्सल र सुमिनाले दक्षिणएसियाली खेलकुद (साग) को महिला एकलतर्फ कांस्यपदकसम्म जितेका थिए । ‘यो नेपाली ब्याडमिन्टनका लागि निकै खुसीको कुरा हो', पूर्वराष्ट्रिय च्याम्पियनसमेत रहेका नेपाल ब्याडमिन्टन संघका महासचिव रामजीबहादुर श्रेष्ठले भने ।

सन् १९९० मा बंगलादेशमा भएको अन्तर्राष्ट्रिय आमन्त्रण प्रतियोगितामा श्रेष्ठले पहिलो स्थान हातपारेका थिए । २७ वर्षीय नङ्सल र २३ वर्षीय रत्नजित पछिल्ला केही संस्करणयता एकल स्पर्धामा लगातार नेपाल च्याम्पियन हुन् । नङ्सल र रत्नजितकी दिदी सरादेवी तामाङ पनि केही पटककी नेपाल च्याम्पियन हुन् । घरेलु ब्याडमिन्टनमा यी तीनैजना नेपाल आर्मी क्लबबाट खेल्ने गर्छन् ।

नेपाली महिला ब्याडमिन्टमा उत्कृष्ट खेलाडीको पहिचान बनाएकी सरादेवीकै प्रेरणामा बहिनी नङ्सल र भाइ रत्नजितले सफलताको बाटो तय गरेका हुन् । सरादेवीले भनिन्, ‘भाइबहिनीले जिते । प्रतियोगिता आफैंले जितेजस्तो लागेको छ । यसका लागि हामीले लामो समय कुरेका थियौं ।'

केहीपटक नङ्सलसँग मिलेर मिश्रित युगलमा राष्ट्रिय च्याम्पियन बन्नुअघि उक्त सफलता रत्नजितले सरादेवीसँग मिलेर हातपारेका थिए ।