संविधान कार्यान्वयन नेपालको प्राथमिकताः भण्डारी

मुखर्जीको नेपाल भ्रमण

काठमाडौः राष्ट्रपति विद्यादेवी भण्डारीले संविधान कार्यान्वयनसँगै भूकम्पपछिको पुनर्निर्माण नेपालको प्राथमिकता रहेको भन्दै दुवै कार्यमा भारतको सहयोगको अपेक्षा राखेकी छन् ।

नेपालको तीनदिने भ्रमणमा रहेका भारतीय राष्ट्रपति प्रणव मुखर्जीको सम्मानमा बुधबार होटल सोल्टीमा दिएको रात्रिभोजमा राष्ट्रपति भण्डारीले यो अभिव्यक्तिसँग घुमाउरो पाराले संविधानप्रति भारतको अनुमोदन खोजे तापनि मुखर्जीले पुनर्निर्माण र नेपालको आर्थिक प्रगतिमा भारतको सहयोग रहने बताउँदै संविधानको अनुमोदन गर्नबाट पन्छिए ।

उनले संघीय लोकतान्त्रिक ढाँचाभित्र रहेर सबैलाई समेट्न शुभेच्छा दिँदै भारत सरकारको अहिलेसम्मको अडानमै कायम रहे । सम्बोधनका क्रममा राष्ट्रपति भण्डारीले गत वर्ष नेपालमा जारी संविधानको उद्देश्य हालैका वर्षमा हामीले हासिल गरेका लोकतान्त्रिक उपलब्धिको रक्षा र सुदृढीकरण गर्नु रहेको स्पष्ट पारेकी थिइन् ।

‘अबको हाम्रो राष्ट्रिय प्राथमिकतामा मुलुकको समृद्धि प्राप्तिका लागि संविधान कार्यान्वयन, भूकम्पपछिको पुनर्निर्माण, सामाजिक आर्थिक रूपान्तरणमा जोड दिनु रहेको छ', उनले भनिन् ।

राष्ट्रपति भण्डारीले मुखर्जीलाई पाँच दशकयतादेखि क्रियाशील दक्षिण एसियाकै वरिष्ठ राजनेता भनेकी छन् । उनले भनिन्, ‘नेपाली जनता तपाईंलाई असल मित्र र राष्ट्रको सेवामा पाँच दशकदेखि समर्पित दक्षिण एसियाकै वरिष्ठ राजनेताका रूपमा उच्च सम्मान गर्दछन् ।' उनले सौहार्द, सद्भावना, समानता र पारस्परिक सम्मानका आधारमा नेपाल र भारतबीच युगौं पुरानो सम्बन्ध रहेको बताउँदै यो निकटता बलियो सामाजिक सांस्कृतिक सूत्र र जनस्तरको सम्बन्धबाट परिपोषित रहेको बताइन् ।

नेपालको विकास अभियानमा भारतले पु¥याएको सहयोगको उनले सराहना गरिन् । ‘विगत सात दशकमा भारतले अनेक क्षेत्रमा उल्लेखनीय प्रगति हासिल गरेको छ । यसै परिप्रेक्ष्यमा द्विपक्षीय आर्थिक सम्बन्ध वृद्धि गर्न हामी इच्छुक छौं', उनले भनिन् ।

भण्डारीले विनाशकारी भूकम्पपश्चात् राहत र खोजी कार्य तथा पुनर्निर्माणमा भारतीय सहयोगका लागि धन्यवाद दिएकी छन् । ‘नेपाल यतिबेला भूकम्पको प्रभावमा परेका निजी घर, अमूल्य सम्पदा र भौतिक संरचनाको जीर्णोद्धार र पुनर्निर्माणको अभियानमा जुटेको छ । राष्ट्रिय संकल्प र मित्रराष्ट्रहरूको सद्भावका आधारमा यो अभियान सफल हुनेमा हामी विश्वस्त छौं', उनले भनिन् ।

विगत दुई वर्ष अवधिमा दुवै देशका प्रधानमन्त्रीको नियमित भ्रमण आदानप्रदान भएको प्रसंगमा मुखर्जीको राजकीय भ्रमणले नेपाल र भारतबीचको निकट द्विपक्षीय सम्बन्धमा नयाँ आयाम थप्ने कुरामा कुनै सन्देह नरहेको उनले बताइन् ।

भारतले छिमेकीसँगको सम्बन्धलाई प्राथमिकतामा राखेको र त्यसमा पनि नेपालसँगको सम्बन्धलाई विशेष महत्व दिइरहेको छ । प्रणव मुखर्जी भारतीय राष्ट्रपति 

यता, भारतीय राष्ट्रपति प्रणव मुखर्जीले भारतले छिमेकसँगको सम्बन्धलाई प्राथमिकतामा राखेको र त्यसमा पनि नेपालसँगको सम्बन्धलाई विशेष महŒव दिइरहेको औंल्याए । नेपालका जनताले शान्ति, स्थिरता, प्रगति र विकासका खातिर हासिल गरेका उपलब्धिको उनले प्रशंसा गरे ।

नेपाल र भारतका जनताबीचको सदीयौंदेखि ऐतिहासिक र सभ्यतामूलक सम्पर्क र सहकार्य रहँदै आएको राष्ट्रपति मुखर्जीले बताए । सामाजिक—आर्थिक, सांस्कृतिक र जनस्तरको सम्बन्धलाई दुई देशका सरकारबीचको पारस्परिक समझदारीले अझै मजबुत पारेको उनले बताए ।

‘यस खालका सम्बन्ध नेपाल र भारतबीचको सम्बन्धका मुटुमा छन्', उनले भने, ‘ती सम्बन्ध नै दुवै देशलाई अघि बढाउने वास्तविक चालक हुन् र तिनले हाम्रो मौलिक र बहुआयामिक सम्बन्धलाई ऊर्जा र गतिशीलता प्रदान गर्छन् ।'

मुखर्जीले नेपाल र भारतका जनताको भाग्य एकआपसमा जोडिएको बताउँदै भने, ‘एकअर्काको खुसी र समृद्धिमा हामीबीच मुख्य हिस्सा छ ।' नेपालमा गत वर्ष गएको भूकम्पपछिको कठिनतामा देखिएको जनताको सहनशीलताको उनले प्रशंसा गरे ।

नेपाल र भारतले ऊर्जा, जलस्रोत, कनेक्टिभिटी, पूर्वाधार विकासमा मिलेर काम गर्नसक्ने उनले बताए । मुखर्जीले एक्काइसौं शताब्दीमा दक्षिण एसिया क्षेत्र र विश्वमै पनि शान्ति र सुरक्षाको चुनौती रहेको उल्लेख गर्दै शान्तिसुरक्षाका लागि वातावरण आवश्यक रहेको बताए ।

आतंकवाद शान्तिसुरक्षाका मुख्य खतरा रहेको उनले बताए । नेपाल र भारतबीच उच्चस्तरीय भ्रमण आदानप्रदान भइरहेको र यसलाई अझ बढाउनुपर्ने उनको भनाइ थियो । राष्ट्रपति विद्यादेवी भण्डारीलाई चाँडै नयाँदिल्लीमा स्वागत गर्न आफू आतुर रहेको पनि भारतीय राष्ट्रपति मुखर्जीले बताए । राष्ट्रपति भण्डारीको गत मे महिनामा तय भएको भारत भ्रमण एकाएक स्थगित भएको थियो ।