ओरालो लाग्दै बारफोनको बजार

काठमाडौंः मोबाइल प्रयोग गर्ने सबैलाई बारफोन बोकेको अनुभव त पक्कै होला ? किप्याड भएको सानो अनि हातमा बोक्न सजिलो त्यो बारफोनको बजार पछिल्लो समय घट्दै गएको छ । स्मार्टफोनको बढ्दो प्रयोगले बजारमा बारफोन प्रयोगमा केही कमी आएको छ ।

विस्तारै बारफोन प्रयोग गर्ने प्रयोगकर्ताको आकर्षण स्मार्टफोनतर्फ हुने भएकाले बारफोनको प्रयोगमा कमी आएको हो । बजार घट्दो भए पनि नेपाली फोन बजारमा बारफोनले ठूलो हिस्सा ओगटेको छ । विशेष गरी ग्रामीण भेगमा ठूलो बजार हिस्सा ओगटेको बारफोनले काठमाडौंजस्ता ठूला सहरमा पनि राम्रो स्थान बनाएको छ ।

बजारमा कलर्स, सामसुङ, जियोनी, माइक्रोम्याक्स, डीटीसीलगायतका दर्जनौ कम्पनीले बारफोनको बिक्री गरिरहेका छन् । आठ सयदेखि चार हजार मूल्यसम्मका बारफोन बजारमा उपलब्ध छन् । सेफ्टीफोनका रूपमा स्थापित हुँदै गएको बारफोन पछिल्लो समय स्मार्टफोन बोक्ने मानिसका हातमा पनि देखिन थालेको छ ।

एउटा पकेटमा स्मार्टफोन बोक्ने मानिसले अर्को पकेटमा बारफोन बोक्ने गरेका छन् । यस्तो अवस्था भए पनि बारफोनको बजार प्रतिदिन घट्दो क्रममा रहेको माइक्रोम्याक्स मोबाइलका मार्केटिङ प्रमुख भुपाल क्षेत्री बताउँछन् । उनका अनुसार प्रयोगकर्ताको आम्दानी र आवश्यकता परिवर्तन हुँदै जाँदा बारफोनको बजार खस्किदै गएको हो ।

‘मानिसहरू स्मार्टफानेमा रमाउँन चाहान्छन्, स्मार्टफानले मानिसका आवश्यकता परिपूर्तिका लागि केही हदसम्म सहयोग नै गरेको छ ।' क्षेत्री बताउँछन्, ‘तर अझै पनि नम्बरको आधारमा बारफोनको बजार हिस्सा ठूलो छ ।'

मार्केटिङ प्रमुख क्षेत्रीले माइक्रोम्याक्सले भारतबाट मोबाइल ल्याउँदा ६० प्रतिशत बारफोन र ४० प्रतिशत स्मार्टफोन ल्याउँने गरेको बताए । नेपाली बजारमा फोन बिक्री भएको आधारमा माइक्रोम्याक्सको स्थिती पनि ६०–४० नै रहेको उनले थपे । तर यो स्थिती अबको केही वर्षमा पूर्णरूपले परिवर्तन हुने उनको भनाइ छ ।

मानिसले सेफ्टी फोनका रूपमा अहिले बारफोन प्रयोग गर्ने गरेका छन् । ब्याट्री ब्याकअप र चलाउन सजिलो हुने भएकाले बारफोनलाई ब्याकअपका रूपमा बोक्ने मानिसको संख्या पनि धेरै रहेको कलर्स मोबाइलका मार्केटिङ म्यानेजर राजजंग थापा बताउँछन् ।

बारफोनको बजारमा आफ्नो छुट्टै पकड बनाएको कलर्सले बार र स्मार्टफोनको अनुपात नेपालमा ६०–४० रहेको उनले बताए । उनका अनुसार ग्रामीण भेगमा मोबाइल नबोक्ने मानिसको संख्या ठूलो भएकाले पनि त्यो समुदायका लागि बारफोनको बजार अझै पर्खिरहेको छ ।

अवस्था जस्तो भए पनि बारफोनको बजार निरन्तर खस्कदै गएको थापा बताउँछन् । यतिसम्मकी जियोनीले बारफोनको बिक्रीलाई नेपालमा रोक्ने सोच बनाइसकेको छ । जियोनी मोबाइलका मार्केटिङ म्यानेजर समिर ढुंगानाले बजारमा बारफोनको बिक्रीलाई रोक्ने सल्लाह भइरहेको बताए ।

उनका अनुसार बार र स्मार्ट दुबै फोन उत्पादन गर्दै आएको जियोनीले बारफोनलाई देखाउँनकै लागि मात्र उत्पादन गरेको हो । बारफोनले जियोनीको कुल बिक्रीमा पाँच प्रतिशत पनि बजार नओगटेको ढुंगानाको भनाइ छ ।

मोबाइल पसलेहरूले पनि बारफोनको बिक्री निरन्तर घट्दै गएको बताएका छन् । मानिसहरूले थोरै पैसा थपेर भए पनि स्मार्टफोन नै किन्न चाहन्छन् । मोबाइल बजारमा बारफोन र स्मार्टफोन ६०–४० को अवस्थामा भए पनि कारोबारको हिसाबले यसको स्थिती २०-८० भएको ललितपुर मोबाइल कम्प्लेक्सका अध्यक्ष पुरुषोत्तम बस्नेत बताउँछन् ।

उनका अनुसार बारफोनको सेल्स ६० प्रतिशत भए पनि आर्थिक कारोबार २० प्रतिशत पनि छैन । दिनमा १० वटा फोन बिक्री हुँदा बारफोन धौ धौले दुईवटा बिक्री हुने गरेको सन मोबाइल कोटेश्वरका सञ्चालक सुरेश बानिया बताउँछन् ।

तर डीटीसी मोबाइलका मार्केटिङ म्यानेजर रोशन न्यौपाने यसमा पूर्ण रूपमा असहमति जनाउँछन् । उनका अनुसार जुन रूपले स्मार्टफोन अपगे्रड हुँदै गएका छन्, त्यही अनुसार बारफोन पनि अपगे्रड हुँदै गएका छन् । त्यसले बारफोनको बजारलाई पनि स्मार्टफोनसँगै अघि बढ्न मद्दत गरेको न्यौपाने बताउँछन् ।

मानिसले बारफोनलाई ब्याट्री ब्याकअप र रेडियो सुन्न प्रयोग गर्दै आएका छन् । साथै लोडसेडिङले पनि बारफोनको बजारलाई थामिराखेको छ । उनका अनुसार कम्पनीले अहिले वार्षिक चारदेखि पाँच लाखको हाराहारीमा बारफोन बिक्री गर्दै आएको छ ।