बम निस्क्रिय बनाउने क्रममा चार घाइते

राजविराजः सदरमुकाम राजविराजस्थित जिल्ला प्रशासन कार्यालयमा राखिएको कुकर बम निस्क्रिय बनाउने क्रममा एक सैनिक र तीनजना प्रहरी घाइते भएका छन् ।

बम निस्क्रिय बनाएको एक घण्टापछि आगो लगाएर नष्ट गर्न खोज्दा बारुदको झिल्को उछिट्टिएर चारजना घाइते भएको प्रहरी नायव उपरिक्षक दानबहादुर कार्कीले जानकारी दिए ।

घाइते हुनेमा श्री कृष्ण दल गणका सिपाही चन्द्रबहादुर गुरुङ, प्रहरी हवल्दार कर्णबहादुर बि.क., प्रहरीहरु बिनोद राजवंशी र राजेश तामाङ रहेका छन् ।

गुरुङको अनुहारमा र अन्य प्रहरीहरुको हात बारुदको आगोकोको लप्काले पोलेर घाइते भएको प्रनाउ कार्कीले बताए । घाइतेहरुको स्थानीय गनासिं सगरमाथा अञ्चल अस्पतालमा उपचार भइरहेको छ ।

प्रहरीको सुरक्षा र निगरानीमा रहने जिल्ला प्रशासन कार्यालयको नागरिकता अभिलेख फाँट रहेको कोठा नं. पाँच नजिकै बम फेला परेपछि कर्मचारी र सेवाग्राही आतंकित बनेका थिए । एक सेवाग्राहीले वेवारिसे अवस्थामा रहेको झोलावारे प्रहरीलाई खवर गरेपछि झोला भित्र कुकर वम राखिएको खुलासा भएको थियो ।

कार्यालयभित्र वम राखिएको हल्ला फिजिएपछि आसपास क्षेत्रमा भागदौड मच्चिएको थियो भने सुरक्षाकर्मीले कार्यालय खाली गराई आवागमन रोकेको थियो ।

यसैबीच अखिल तराई मुक्ति मोर्चाले सोको जिम्मा लिएको छ । मोर्चाका केन्द्रिय संयोजक जयकृष्ण गोईतले सञ्चारकर्मीहरुलाई फोन गरी उक्त वम राखेको घटनाको जिम्मा लिएका हुन् । उनले तराई मधेशमा सेना प्रहरी र वन्दुकको वलमा शान्तिपुर्ण आन्दोलनलाई दमन गर्दै लैजाने सरकारको प्रवृत्ति विरुद्ध चेतावनी स्वरुप वम राखिएको बताएका छन् । संयोजक यादवले अझ सशक्त गतिविधि अघि वढाउने चेतावनी समेत दिएका छन् ।