काठमाडौं: एमाले सचिव गोकर्ण विष्टले भारतको नाम नलिइ विदेशीको इशारामा आएको संविधान संशोधन विधेयकको प्रस्ताव स्वीकार्य नहुने बताएका छन् ।
राजधानीमा आयोजित अन्तरक्रिया कार्यक्रममा बोल्दै विष्टले जनसंख्याको आधारमा राष्ट्रिय सभाको निर्माण गर्ने प्रस्ताव कसको इसारामा आयो भन्दै भारततर्फ संकेत गरेका हुन् ।
‘हरेक प्रदेशको समान संख्यामा राष्ट्रियसभामा प्रतिनिधित्व हुने व्यवस्था हुँदा–हुँदै जनसंख्याको आधारमा राष्ट्रियसभाको निर्माण गर्ने कुरा ल्याएर राष्ट्रिसभालाई असन्तुलित बनाउने प्रस्ताव कसको इसारामा आयो ?’, प्रश्न गर्दै विष्टले भने, ‘संसद् संवैधानी र कानुनी प्रस्ताव उपर छलफल गर्ने थलो भएको हुँदा संविधान र कानुनको दायरा बाहिरबाट ल्याइएको प्रस्तावलाई नेकपा एमालेले कुनैपनि हालतमा संसदमा छलफलमा गर्न दिन सक्दैन् ।’
संविधान संशोधन प्रस्तावले देशमा संवैधानिक तथा राजनीतिक अराजकता पैदा गरेको समेत विष्टको भनाइ छ । संविधानको धारा २७४ को ४ र ५ ले रुपान्तरित संसदलाई सीमा हेरफेरको अधिकार नदिएको भन्दै विष्टले संविधानको पालनकर्ता सरकार स्वयम् नै संविधानको बर्खिलापमा लागेको आरोप लगाए ।
संसारको कुनै पनि संविधान शत प्रतिशत पूर्ण हुन नसक्ने भन्दै उनले नेपालको संविधान जनपक्षीय, लोकतान्त्रिक, प्रगतिशिल र अग्रगामी भएको दाबी गरे । नेता विष्टले संविधान संशोधन प्रस्ताव तत्काल फिर्ता गरेर चुनावको मिति घोषणा गर्न समेत सरकारलाई आग्रह गरेका छन् ।
‘देशको अहित हुने गरी आएको संविधान संशोधन प्रस्ताव फिर्ता गरेर सरकारले तत्काल चुनावको घोषणा गर्नुपर्छ,’ नेता विष्टले भने ।
प्रतिक्रिया दिनुहोस !
