जाजरकोटः जाजरकोटमा आमाको हत्या गर्ने एक दम्पतीलाई सर्वस्वसहित जन्मकैदको फैसला सुनाइएको छ । सक्ला १ लैखमका बुद्धिबहादुर खत्री र उनकी पत्नी शर्मिला वली खत्रीलाई आमा देउमी खत्रीको हत्या गरेको अभियोगमा जिल्ला अदालत जाजरकोटले सर्वस्वसहित जन्मकैद सजाय गरेको हो । जिल्ला न्यायाधीश लीलाराज अधिकारीको इजलासले मुलुकी ऐनअनुसार हत्यामा संलग्न दुवैजनालाई सर्वस्वसहित २० वर्ष ६ महिना जेलसजाय तोकेको हो ।
देउमीका श्रीमान् लगवीर खत्री र जेठा छोराबुहारीको मृत्यु भइसकेको छ । देउमी जेठा छोराका दुई छोराछोरी पालेर बस्दै आएकी थिइन् । उनीहरू अध्ययनका लागि जिल्लाबाहिर गएपछि एक्लै बस्दै आएकी थिइन् ।
नलसिंहगाड जलविद्युत् आयोजना निर्माणका लागि अधिग्रहणमा परेको देउमीका नाममा रहेको जग्गा आफ्नो नाउँमा नामसारी गराउन बुद्धिबहादुर र उनकी श्रीमतीले दबाब दिँदै आएका थिए ।
देउमीले जेठा छोराका छोराछोरीको सहमतिबिना जग्गा नामसारी गर्न नमानेपछि उनीहरू आमाको हत्या गर्ने योजनामा पुगेका थिए । जग्गा नामसारीका लागि श्रीमती शर्मिलाले कि आमालाई मार, नत्र म भीरबाट हामफालेर मर्छु भनेपछि आफूले आमाको हत्या गरेको बुद्धिबहादुरले अदालतको बयानमा स्वीकार गरेका थिए । आमाको हत्यापछि उनीहरूले घरनजिकैको बारीमा शव गाडेका थिए ।
प्रहरीका अनुसार सुतिरहेकी आमालाई बुद्धिबहादुरले बन्चरोले टाउकोमा हिर्काएका थिए । ‘एउटामात्र चोटले मरेकी छैनन् कि जस्तो छ’, बुद्धिबहादुरले अर्काेपटक हान्न खोज्दै भनेका थिए । फेरि घाँटीमा जोडले हिर्काएर आमालाई मारेपछि दुवै लोग्नेस्वास्नी मिलेर घिसार्दै नजिकैको मकैबारीमा एक दिनअघि खनेको खाल्डोमा गाडेका थिए ।
अरूले थाहा पाउलान् भनेर बुद्धिबहादुरका श्रीमान् श्रीमतीले शव गाडेको ठाउँमाथि पीपलको बेर्ना पनि रोपे । गत साउन २२ गते आमालाई मारेर मकैबारीमा गाडेका बुद्धिबहादुरले २३ गते बिहान गाउँभरि आमा घरबाट हराएको हल्ला चलाएका थिए । आमा खोजिदिन भन्दै उनले प्रहरी चौकीमा निवेदन पनि दिएका थिए ।
देउमीका भतिजा हरिबहादुर खत्रीले भदौ ६ गते प्रहरीमा किटानी जाहेरी दिएका थिए । घटना भएको तीन सातापछि प्रहरीले दुवै श्रीमान् श्रीमतीलाई पक्राउ गरेको थियो । अहिले बुद्धिबहादुर जाजरकोट कारागारमा छन् भने शर्मिला साढे दुई वर्षको छोराको साथमा बर्दिया कारागारमा रहेको जिल्ला प्रहरी कार्यालय जाजरकोटका निमित्त प्रमुख हिक्मतबहादुर बोहराले बताए ।
प्रतिक्रिया दिनुहोस !
