काठमाडौः इस्लिङ्टन कलेजमा स्नातक र स्नातकोत्तर तहमा अध्ययनरत ३ सय १५ जना विद्यार्थी दीक्षित भएका छन् । लन्डन मेट्रोपोलिटियन विश्वविद्यालयका उपकुलपति प्राध्यापक जोन र्याफ्टरी र सहउपकुलपति डोमिनिक पामर ब्राउनले विद्यार्थीलाई दीक्षान्तको प्रमाणपत्र प्रदान गरे ।
दीक्षान्त समारोहमा उपकुलपति र्याफ्टरले इस्लिङ्टन कलेज विश्वविद्यालयको अति महत्वपूर्ण साझेदार रहेको बताए । उनले आफ्ना विश्वविद्यालय र अन्तर्गतका कलेजमा पढ्ने विद्यार्थीको परीक्षाको नतिजा उच्च रहेको बताए ।
कलेजका अध्यक्ष एवं प्रमुख कार्यकारी अधिकृत सुलभ बुढाथोकीले अन्तर्राष्ट्रिय स्तरको शिक्षा हासिल गर्न सफल नेपालका विद्यार्थी सोही स्तरको दक्षता हासिल गरी राष्ट्रिय तथा अन्तर्राष्ट्रिय स्तरमै नाम कमाउन सफल भएको बताए । दीक्षित विद्यार्थीलाई नेपालमै बसेर देशको सेवा गर्न उनले आग्रह गरे ।
दीक्षित हुनेमा बीएस्सी अनर्स कम्प्युटिङमा १ सय ५६, नेटवर्किङमा ६७, मल्टिमिडियामा ३१, बीबीएमा ५३ र एमएससीआईटीमा ८ जना विद्यार्थी छन् ।
दीक्षान्त समारोहमा विश्वविद्यालयका अन्य पदाधिकारी, नेपालका शिक्षा क्षेत्रका वरिष्ठ व्यक्तित्वहरूको उपस्थिति थियो । यस कलेजले विगत दुई दशकदेखि नेपालमा अन्तर्राष्ट्रिय स्तरको शिक्षा प्रदान गर्दै आएको छ ।
उक्त कलेजबाट हालसम्म ३ हजार ५ सयभन्दा बढी विद्यार्थी अध्ययन पूरा गरी राष्ट्रिय, अन्तर्राष्ट्रिय तथा बहुराष्ट्रिय संघसंस्थामा कार्यरत रहेको कलेजले जनाएको छ ।
प्रतिक्रिया दिनुहोस !
