काठमाडौः सामान्य कुराकानी ‘हेलो’ बाट सुरु भएको फोनको प्रयोग एसएमएस, गेम, आईओएस, मल्टी टास्किङ र एन्ड्रोएड हुँदै कम्प्युटर र ल्यापटका रूपमा गर्न थालिएको छ । स्मार्टफोन अहिले कनेक्टिभिटी, इन्टरनेट, इमेल र अन्य महत्वपूर्ण फाइल राख्न प्रयोग भइरहेको छ ।
पछिल्लो समय प्रयोगकर्ताले स्मार्टफोनलाई क्यामराका रूपमा प्रयोगमा ल्याइरहेका छन् । यसको फलस्वरूप अहिले बजारमा डबल लेन्स क्यामरासहितका स्मार्टफोन उपलब्ध छन् । अहिले बजारमा उपलब्ध स्मार्टफोनमध्ये आइफोन ७ र हुवावेको पी ९ मा डबल लेन्स फोन हुन् ।
विश्व बजारको तुलना गर्ने हो भने उच्च मूल्यका समार्टफोनमध्ये हुवावे, आइफोन र एलजीले डबल लेन्स क्यामरासहितका स्मार्टफोन ल्याएका छन् । यसले स्मार्टफोन बिक्रीमा तहल्का नै मच्चाएको छ । यस वर्ष हुवावे विश्व स्मार्टफोन उत्पादन कम्पनीमध्ये सबैभन्दा बढी मुनाफा गर्ने कम्पनी भएको छ ।
यसको प्रमुख कारण पनि कम्पनीले बजारमा ल्याएका डबल लेन्स क्यामरासहितका स्मार्टफोन पी ९ र पी ९ प्लस रहेको हुवावे मोबाइलका नेपालका लागि बजार व्यवस्थापक सुमित प्रधानांग बताउँछन् । त्यस्तै नेपालमा भित्रिएको तीन दिनमै १८ सयभन्दा बढी आइफोन सेभेनको बिक्री हुनु पनि त्यसमा प्रयोग गरिएको क्यामरा प्रमुख रहेको बताइएको छ ।
प्रधानांगका अनुसार ग्राहकले क्यामरा भएको स्मार्टफोनभन्दा क्यामराका लागि स्मार्टफोन खरिद गर्न थालेका छन् । ग्राहकको चाहनालाई मध्यनजर राख्दै स्मार्टफोन उत्पादक कम्पनीले क्यामरालाई प्रथामिकतामा राखेर आफ्ना उत्पादन बजारमा ल्याउने गरेका छन् । यसैको फलस्वरूप डबल लेन्स क्यामरासहित स्मार्टफोन बजारमा आएका हुन् ।
दुई वटा क्यामरा अर्थात् बढी सेन्सर
स्मार्टफोनमा डीएसएलआर क्यामरा प्रयोग गर्न सकिएको छैन् । तर राम्रो फोटाका लागि ठूलो सेन्सर एरिया नै चाहिन्छ जुन सानो उपकरणमा सम्भव हुँदैन । फोनमा दुई वटा क्यामरा प्रयोग गरी सेन्सर एरिया बढाइएको हुन्छ जसले बढी पिक्सल डाटा र डिटेल खिच्न सकिन्छ ।
जस्तोसुकै लाइटमा पनि उत्कृष्ट
हालसम्मका स्मार्टफोनबाट प्रयाप्त प्रकाश नभएका ठाउँमा फोटो खिच्दा अप्टिकल इमेज स्टेविलाइजेसन (ओआइएस) को प्रयोग गरिन्छ । तर डबल लेन्स क्यामरा भएका फोनमा ठूलो सेन्सर एरिया हुने भएकाले जुनसुकै समयमा पनि उत्कृष्ट फोटो लिन सकिन्छ ।
सस्तो मूल्य
डीएसएलआर क्यामरा खरिद गर्न चाहिने रकमले दुई वटा स्मार्टफोन किन्न सकिन्छ । हुवावेले मिड रेन्जका फोनमा पनि डबल लेन्सयुक्त स्मार्टफोन ल्याउने तयारी गरिरहेको जनाएको छ । यसबाट कम बजेटमा डबल लेन्सयुक्त स्मार्टफोन खरिद गर्न सकिने भएको छ ।
रियल र अप्टिकल जुम
सिंगल क्यामरा भएको स्मार्टफोनमा डिजिटल जुमको प्रयोग गरिएको हुन्छ भने डुअल क्यामरामा रियल र अप्टिकल गरी दुई छुट्टा–छुट्टै लेन्सको प्रयोग गरिएको हुन्छ । डिजिटल जुमले फोटो खिचेपछि फोटोलाई ठूलो बनाउने काम गर्छ जुन रियल टाइममै हुन्छ । अर्कोतर्फ अप्टिकल जुमले फोकल लेन्थ मिलाउने र वस्तुलाई नजिक ल्याउने काम गर्छ जसको प्रयोग अनुभवी फोटोग्राफरले मात्रै गर्छन् ।
डेप्थ अफ फिल इफेक्ट
डुअल लेन्स स्मार्टफोन प्रयोगकर्ताले सबैभन्दा बढी रुचाउने भनेकै डेप्थ अफ फिल इफेक्ट हो । यसमा एकभन्दा बढी लेन्सको मद्दतले ब्याकग्राउन्डलाई धमिलो बनाई आफूले रोजेको वस्तुलाई फोकसमा राखिन्छ । तर एउटा मात्र क्यामरा भएको स्मार्टफोनमा यो इफेक्ट प्रभावकारी रूपमा लागू गर्न सकिदैन । केही स्मार्टफोनमा एप्सको मद्दतले उक्त इफेक्टको प्रयोग गरिए पनि डुअल क्यामराले दिने रियल डेप्थ, लेयर र कन्ट्रास्टसहित धमिलो ब्याकग्राउन्ड बनाउन सकिदैन ।
प्रतिक्रिया दिनुहोस !
