कस्तो हुनेछ नोकियाको कमब्याक

काठमाडौः मोबाइल फोनको बजारमा कुनै समय अब्बल स्थानमा रहेको नोकियाले केही समयको वि श्रामपछि फेरि कमब्याक गरेको छ । नोकियाले सन् २०१७ को सुरुवातसँगै चीनबाट स्मार्टफोनका साथ विश्व बजारमा पुनः फर्किंएको हो । कम्पनीले पहिलो एन्ड्रोएड फोन ‘नोकिया ६' चीनमा सार्वजनिक गरेको छ ।

तर नोकियाको कमब्याक पेयपदार्थको बजारमा ‘चिसो भनेकै कोकाकोला' जस्तै हुनसक्ने अनुमान गर्छन् मोबाइल व्यवसायी । बजारमा कोकाकोलाभन्दा अन्य ब्रान्डको उपस्थिति नहुँदा चिसो पेयपदार्थ भनेकै कोकाकोलामात्र हो भन्ने मानिसमा परेको थियो ।

पसलमा गएर अझै पनि कोक दिनु भन्ने मानिस धेरै छन् । कोक भनेर कोकाकोला नै खान्छन् भन्ने चाहीँ अहिले छैन । विस्तारै पेय पदार्थको बजारमा अन्य ब्रान्डको उपस्थिति बाक्लिएको छ । अहिले ग्राहकले आफ्नो स्वादअनुसारको चिसो किनेर खान्छन् । नोकियाको अवस्था पनि त्यस्तै हो । कुनै समयको मोबाइल बजारको एक्लो हिरो अब दर्जनौंको संख्यामा रहेका स्थापित मोबाइल ब्रान्डसँग जुध्नुपर्नेछ ।

ब्रान्डले परिचित नोकियालाई एन्ड्रोएडमा आउनु मात्र पूर्ण छैन् । त्यसका लागि पहिले उसले आफ्नो गुणस्तरलाई निरन्तरता दिन सक्नुर्ने छ । 

एक दशक अघिसम्म पनि विश्व मोबाइल बजारमा नम्बर वान मोबाइल उत्पादन कम्पनीका रूपमा रहेको नोकियाको बजार हिस्सा नै छैन । नेपालको मोबाइल बजारमा सन् २०१० सम्म पनि ७० देखि ८० प्रतिशत हिस्सा ओगटेको कम्पनी अहिले विश्व स्मार्टफोन बजारमा आफ्नो स्थान खोजिरहेको छ । अहिले बजारमा दर्जनौंको संख्यामा स्थापित मोबाइल ब्रान्डको उपस्थिति छ ।

अहिले मोबाइलमा प्रयोग भएको प्रविधि र मूल्यलाई मध्यनजर गरेर ग्राहकले मोबाइल किन्छन् । तर पनि मोबाइलको व्यापारमा ब्रान्डले पनि केही प्रभाव पार्ने भएकाले एन्ड्रोएडमा आधारित स्मार्टफोनका साथ नोकियाको कमब्याक केही हदसम्म फलदायी हुनसक्नेछ । माइक्रोम्याक्स मोबाइलका मार्केटिङ प्रमुख भुपाल क्षेत्रीका अनुसार नोकियाको पुनरागमन यसको ब्रान्डप्रति रहेको मानिसको विश्वासले यसलाई बजारमा सहज हुनेछ ।

उनले भने, ‘बजारमा कहिल्यै ब्रान्ड नसुनेका चाइनिज मोबाइलले मार्केट लिइरहेको अवस्थामा नोकिया त स्थापित ब्रान्ड हो । यसले मोबाइलको बजारमा आफ्नो स्थान बनाएको थियो र फेरि पनि बनाउन सक्नेछ ।' यसको कमब्याकले नेपाली बजारमा मात्र नभएर विश्व मोबाइल बजारमा यसले प्रभाव पार्नेछ ।

अहिलेको मोबाइल बजारमा नोकियाको कुनै उपस्थिति नभए पनि संसारमा सबैभन्दा बढी बिक्री भएका मोबाइलमा नोकियाको ११०० मोडेल पहिलो स्थानमा छ । टेलिग्राफले प्रकाशित गरेको समाचारअनुसार विश्वमा आजसम्म बिक्री संख्याको आधारमा उत्कृष्ट २०को सूचीमा नोकियाका विभिन्न १२ वटा मोडेल रहेका छन् ।

उक्त सूचीको पाँचौं स्थानसम्म नोकियाकै फोन छन् । बारफोनको बजारमा नोकियाले पाएको सफलता एन्ड्रोएडमा पनि पाउन सक्ने युविक्युटी प्रालिका जनरल म्यानेजर अनमित्र शर्मा बताउँछन् । उनका अनुसार ब्रान्डले परिचित नोकियालाई एन्ड्रोएडमा आउनु मात्र पूर्ण छैन । त्यसका लागि पहिले उसले आफ्नो गुणस्तरलाई निरन्तरता दिन सक्नुपर्नेछ ।

दास्रो कती मूल्यमा कस्तो प्रविधिमा मोबाइल बजारमा आउनेछन भन्ने कुराले पनि फरक पार्नेछ । उत्कृष्ट प्रविधिका साथ सुपथ मूल्यमा नोकियाको स्मार्टफोन आएको खन्डमा यसले ग्राहकमा प्रभाव पार्नसक्ने बताउँछन् लाइफकम प्रालिका प्रबन्ध निर्देशक अमित अग्रवाल । उनका अनुसार नेपालको मोबाइल बजार मूल्यमा आधारित भएकाले नोकियाका मोबाइलमा राखिने बजार मूल्य महत्वपूर्ण हुनेछ ।

हुवावे मोबाइलका बजार व्यवस्थापक सुमित प्रधानांगका अनुसार सामसुङ, हुवावे, जियोनी, माइक्रोम्याक्स, लेनोभो, वानप्लस, ओप्पो, साओमी जस्ता उत्कृष्ट ब्रान्डबीच नोकियालाई आफ्नो बजार स्थापित गर्न चुनौती छ । उनले भने, ‘सात वर्षसम्म गुमनाम रहेको नोकियालाई अबको बजारमा पुरानै अवस्थामा फर्काउन सानो प्रयासले हुदैन । पक्कै पनि ब्रान्डले यसलाई फाइदा पुर्‍याउनेछ ।

ब्रान्ड नेमका आधारमा ग्राहकमाझ जान उसलाई सहज हुनेछ । तर बिचमा नोकियाका उत्पादनले पाएको असफलता कम्पनीका लागि हानी पुग्नेछ ।' बिचमा नोकियाले माइक्रोसफ्टको नाममा स्मार्टफोन ल्याएको थियो जुन असफल बन्यो । त्यसैले नोकियाले बजारमा सामसुङ, हुवावे जस्ता ठूला ब्रान्डले बजारमा प्रभाव बनाइसकेको बुझ्नुपर्नेछ ।

कम्पनीले यही २६ तारिखबाट स्पेनमा हुने वल्र्ड मोबाइल कंग्रेस इभेन्टमार्फत आफ्नो दुई नयाँ मोडेलका स्मार्टफोन सार्वजनिक गर्ने तयारी गरेको छ । स्पेनमा हुने सो इभेन्टमार्फत कम्पनीले नोकिया फाइभ र पी वान दुई फोन सार्वजनिक गर्ने योजना बनाएको छ । त्यहाँ हुने मोबाइल सार्वजनिक नोकियाका लागि पुनरागमनको एउटा महत्वपूर्ण कदम हुनेछ । नोकियाले त्यहाँ कस्तो प्रविधिका साथ मोबाइल सार्वजनिक गर्नेछ, त्यसले बजारसमेत निर्धारण गर्नेछ ।