होटलमा प्रहरीको छापा : शंकास्पद तीन जोडी पक्राउ
नुवाकोट : नुवाकोटको सदरमुकाम विदुरमा होटलमा प्रहरीले शनिबार छापा मारेको छ। अनैतिक क्रियाकलाप बढेको स्थानीयको उजुरीपछि प्रहरीले पहिलो पटक सदरमुकाम विदुर नगरपालिका भित्र रहेका विभिन्न होटलमा छापा मारेको हो।
विदुर, वट्टार, ढुंगेमा रहेका विभिन्न होटेलमा अपराह्न छापा मार्ने क्रममा होटेलको लजमा शंकास्पद अवस्थामा तीन जोडीलाई नियन्त्रणमा लिइएको जिल्ला प्रहरी कार्यालय नुवाकोटका प्रहरी निरीक्षक जीतेन्द्रकुमार बस्नेतले जानकारी दिए। बस्नेतका अनुसार होटलमा अनैतिक क्रियाकलाप हुने गरेको उजुरीपछि छापा मारिएको हो।
नियन्त्रणमा लिएका तीन जोडीलाई होटल तथा रेष्टुरेण्ट व्यवसायी संघ नुवाकोटको समन्वयमा पारिवारिक तथा सामाजिक कारण पहिलो पटक सचेत गराई छाडिएको प्रहरी निरीक्षक बस्नेतले जानकारी दिए।
पासाङल्हामु मार्ग तथा गल्छी-विदुर-रसुवागढी सडक सञ्चालनसंगै होटलमा अवैध यौन धन्दा हुने गरेको स्थानीयवासीको गुनासो छ।
प्रतिक्रिया दिनुहोस !
