विस्तार हुँदै मोबाइल हव
काठमाडौः पछिल्लो समय मोबाइल बजारका लागि मोबाइल हव निर्माण गर्ने क्रम बढिरहेको छ । केही वर्ष अघिसम्म पनि काठमाडौंमा मात्रै सीमित यो ट्रेन्ड विस्तारै उपत्यकाबाहिरका सहरमा पनि देखिन थालेको हो । पोखरा, बुटवल, नेपालगन्ज, नारायणघाटलगायतका सहरमा पनि मोबाइल हवको विकास भएको छ । काठमाडौंको पाको न्युरोडमा रहेको ताम्राकार कम्प्लेक्सले पाएको मोबाइल हवको परिचयले पनि यस्ता हवको निर्माणमा आकर्षण देखिएको हो ।
मोबाइलका पसलले मात्र भरिएको ताम्राकार कम्प्लेक्सजस्तै अन्य स्थानमा पनि यस्ता भवन निर्माण भएका छन् । कतिपय स्थानमा भवनको सीमित फ्लोरलाई मात्र पनि मोबाइल बजारको रूपमा विकास गरेको पाइन्छ । एउटै स्थानमा बजारमा भित्रिएका सम्पूर्ण ब्रान्डका मोबाइल उपलब्ध गराउनुका साथै उक्त ब्रान्डको मर्मत सेन्टरसमेत खोलेर ग्राहकलाई सेवादिने मोबाइल बजारको राम्रो पक्षसमेत भएको मोबाइल व्यवसायी बताउँछन् ।
‘मोबाइल हवको विकासले मोबाइल किन्ने ग्राहकलाई पनि सहज भएको छ,' ताम्राकार मोबाइल व्यापार संघका अध्यक्ष जगत साउद भन्छन् । ‘मोबाइलको बजारसमेत विस्तार हुँदै गएको छ । कुनै समय ७५ वटै जिल्लाका मानिसको मोबाइल खरिद गर्ने मुख्य स्थानको रूपमा रहेको ताम्राकार कम्प्लेक्सबाट बजार अन्यन्त्र विस्तार हुँदैछ । त्यतिमात्र होइन ताम्राकार कम्प्लेक्समा दिइने सुविधा ग्राहकले अन्यन्त्र पाउँदा ताम्राकार हाउस जानुपर्छ भन्ने मानिसको सोचमा परिवर्तन आएको पाएको छु', साउद थप्छन् ।
मोबाइल हवको रूपमा अहिले उपत्यकामै चार भन्दाबढी स्थान छन् । काठमाडौंको पाको न्युरोडमा रहेको ताम्राकार कम्प्लेक्स अरुको लागि उदाहरण बनेको छ । यसैलाई पछ्याउँदै ललितपुरको लगनखेलमा ललितपुर मोबाइल कम्प्लेक्स सञ्चालनमा आएको छ । त्यस्तै बालाजुमा बीजी मल र सुन्धारामा सिभिल ट्रेड सेन्टर (सीटीसी मल) सञ्चालनमा छन् । उपत्यकाबाहिर पोखराको महेन्द्र पुलमा रहेको सीता भवन पनि यसको अर्को उदाहरण हो । पोखराको सीता भवन पोखराको मोबाइल बजार भनेर चिनिएको छ ।
ताम्राकार हाउसले पशुपति प्लाजामा रहेका मोबाइल पसललाई विस्थापित गर्यो । अन्य ठाउँमा खुलेको मोबाइल बजारले ताम्राकार हाउसलाई असर गर्न सक्छ ।
त्यस्तै बुटवल अमरपथमा रहेको सीतारा मिनी मार्केट र नारायणघाटको इन्द्रदेव सिनेमा हलसँगै रहेको बजारले पनि मोबाइल बजारको नाम पाएको छ । ‘यस्तो किसिमको बजारको भविष्य पनि राम्रो छ,' ललितपुर मोबाइल कम्प्लेक्सका अध्यक्ष पुरुषोतम बस्नेत भन्छन् । यसरी मोबाइल बजारको विस्तार हुँदा एकातर्फ ग्राहक लाभान्वित भएका छन् भने अर्कोतर्फ व्यवसायीको लगानी सुरक्षित भएको छ । हवमा सबैभन्दा ठूलो कुरा प्रतिस्पर्धा धेरै हुन्छ । धेरै पसल एकै ठाउँमा हुँदा सबैभन्दा कम मूल्यमा मोबाइल दिन सक्ने पसलबाट ग्राहकले मोबाइल खरिद गर्छन् ।
सबैभन्दा महत्वपूर्ण कुरा यसरी मोबाइल हवको निमार्ण हुँदा मोबाइल बजारको विस्तार भएको छ । कुनै समय ताम्राकार कम्प्लेक्सजस्तै मोबाइलको लागि परिचित पशुपति प्लाजा अर्को उदाहरण हो । ‘सुरुमा पशुपति प्लाजाका सबै सटर मोबाइलका पसलले भरिएका थिए,' साउद भन्छन् । तर अहिले सीमित मात्रामा मोबाइल पसल त्यहाँ बाँकी छ । ताम्राकारले त्यहाँको ग्राहकलाई तान्यो । अब अन्य ठाउँमा खुलेका मोबाइलको बजारले ताम्राकारको बजार तान्न नसक्ला भन्न सकिन्न । यसका लागि समय लाग्छ तर विस्तारित मोबाइल बजारले यसलाई पनि असर पार्नेछ ।
‘पछिल्लो समय त भवन निर्माण गर्ने निर्माणकर्ता नै आफ्नो भवनमा मोबाइल पसल खोल्नुपर्छ भन्न थालेका छन,' बस्नेत भन्छन् । मलमा मोबाइलको बजार भयो भने मल चल्छ भन्ने सोच नै सिर्जना भएको छ । त्यसले नयाँ भवन बनेको ठाउँमा मोबाइलको बजार विस्तार भएको छ ।
प्रतिक्रिया दिनुहोस !
