काठमाडौ : टयाक्सीमा जडान हुने २२४ वटा मिटरसहित ती मिटर जडान गरी बिक्री गर्ने धिरेन्द्र फुयाललाई प्रहरीले नियन्त्रणमा लिएको छ । काठमाडौ महानगरपालिका वडा नम्बर १६ बसन्तपुरबाट २७ बर्षीय धिरेन्द्र फुयाललाई ती मिटरसहित प्रहरीले नियन्त्रणमा लिएको हो ।
प्रहरीका अनुसार कार्गो मार्फत त्रिभुवन अन्तराष्ट्रिय बिमानस्थलबाट भन्सार छलेर ल्याइएका मिटर नियन्त्रणमा लिइएको हो । केहि समययतादेखि ती मिटर काठमाडौ खरिद बिक्री हुने गरेको बिशेष सूचनाका आधारमा केन्द्रीय अनुसन्धान व्यूरोबाट खटिएको प्रहरी टोलीले आइतवार नियन्त्रणमा लिएको हो ।
इजी वे इलेक्ट्रोनिक इन्टरप्राइज नामक टयाक्सी मिटर विक्री तथा मर्मत केन्द्रका सञ्चालक रहेका दोलखाको तामाकोशी गाउँपालिका वडा नम्बर ६ घर भएका फुयाललाई पक्राउ गरिएको प्रहरीले जनाएको छ । भन्सार छलेर ल्याइएका बिभिन्न सिरियल नम्बरका २२ लाख ४० हजार मूल्य बरावरका दुई सय २४ वटा मिटर प्रहरीले नियन्त्रणमा लिएको हो । निजलाई कार्वाहीका लागि राजस्व अनुसन्धान बिभागमा बुझाइएको प्रहरी प्रवक्ता मिरा चौधरीले जानकारी दिइन ।
प्रतिक्रिया दिनुहोस !
