बार्सिलोनाको जितमा ड्युलोफु बने नायक

बार्सिलोना : जेरार्ड ड्युलोफुले उत्कृष्ट प्रदर्शन गरेपछि साविक विजेता बार्सिलोनाले स्पेनिस कोपा डेल रे फुटबल प्रतियोगिताको बुधबार भएको खेलमा जित हात पारेको छ । बार्सिलोनाले तेस्रो डिभिजनको टोली मुर्सियालाई ३-० गोलले हरायो । जितसँगै बार्सिलोनाले प्रिक्वार्टरफाइनल प्रवेशको सम्भावना बलियो बनाएको छ । दोस्रो लेग खेल बार्सिलोनाको मैदानमा हुनेछ ।

मुर्सियाविरुद्धको खेलमा बार्सिलोना लियोनल मेसी, आन्द्रेस इनिएस्टा, लुइस स्वारेज लगायतका स्टार खेलाडीबिना नै मैदानमा उत्रिएको थियो । ड्युलोफुले पहिलो गोलका लागि उत्कृष्ट अवसर सिर्जना गर्दै एकल प्रयासमा अर्को गोल पनि गरेपछि बार्सिलोनाको सहज जित सम्भव भएको थियो । बार्सिलोनालाई ४४औं मिनेटमा पाको अल्कासरले पहिलो गोल गरे । उनले ड्युलोफुको क्रसमा हेडिङ गोल गरेका थिए । यो सिजन स्ट्राइकर अल्कासरले गरेको पहिलो गोल हो।

चार वर्षपछि फेरि बार्सिलोनामा आबद्ध भएका ड्युलोफुले ५२औं मिनेटमा एकल प्रयासमा अर्को गोल थपे । उनले विपक्षीका तीनजना डिफेन्डरलाई छक्याउँदै गोल गरेका थिए । ५६औं मिनेटमा रिजर्भ टोलीका स्ट्राइकर जोसे आर्नाइजले आफ्नो ‘डेब्यु’ खेलमै गोल गरेपछि बार्सिलोनाको जित ३-० ले पक्का बनेको थियो । बार्सिलोनाका प्रशिक्षक अर्नेन्टो भालभर्डीले युवा स्ट्राइकर आर्नाइजको प्रशंसासमेत गरे । ‘उनी केही गर्नसक्ने क्षमताका खेलाडी हुन् । डेब्यु खेलमै गोल पनि गरेका छन् । उनले भविष्यमा अझ राम्रो प्रदर्शन गर्नेछन्’, प्रशिक्षक भालभर्डीले भने ।

अर्को खेलमा सेभिलले पनि जित हात पारेको छ । सेभिलले तेस्रो डिभिजनकै क्लब कार्ताजेनालाई ३-० गोलले पराजित गर्‍यो । जितसँगै पछिल्लो तीन खेलको पराजयको शृंखलालाई तोडेको सेभिलले प्रिक्वार्टरफाइनल प्रवेशको सम्भावना पनि बलियो बनाएको छ ।

सेभिल यसअघि स्पेनिस ला लिगामा भ्यालेन्सियासँग ४-०, एथलेटिक बिल्बाओसँग १-० र च्याम्पियन्समा स्पार्टक मस्कोसँग ५-१ गोलले पराजित भएको थियो । अन्य खेलमा भ्यालेन्सिया र डेपोर्टिभो आल्भेसले पनि जित हात पारे । मालागा भने दोस्रो डिभिजनको टोली न्युमान्सियासँग २-१ गोलले पराजित भयो । भ्यालेन्सियाले रियल जारागोजालाई २-० र डेपोर्टिभो ला कोरुनाले गेटाफेलाई १-० गोलले पराजित गरे ।